Ayera mainta San Nicolas Business Association (SNBA) conhuntamente cu Aruba Tourism Authority (ATA) y Aruba Excellence Foundation a firma un Memorandum of Understanding (MoU) pa loke ta trata e continuacion di desaroyo den e area aki.

Ayera a bin dilanti un oportunidad grandi pa San Nicolas y pa ‘pariba di brug’ unda nan a firma un MoU cu ATA y Aruba Excellence Foundation cu ta encera un extension y un muestra di e desaroyo cu ta tumando luga na San Nicolas unda cu e presidente nobo di SNBA Errol de Freitas a señala cu e union aki ta hopi importante pa por logra esey.

El a bisa cu aworaki tin tres proyecto tumando luga na Sero Colorado pero tambe tin e embeyecemento di full e area di San Nicolas cu ta bay sosode den un plaso cortico manera el a sigura.

“Pa nos e MoU ta encera un oportunidad pa partner cu e dos organisacion aki pa e desaroyo positivo di lo cual ta bin pariba di brug, nos ta hopi orguyoso pa esaki”, de Freitas a señala.

Di su parti, Ronella Croes ken ta fungi como CEO di ATA a expresa cu esaki ta un proceso cu a dura añanan unda e pandemia a bin memey di dje y esey tambe no a yuda, ATA como miembro di SNBA ta gradici tur e colaboracion.

Recientemente ATA y SNBA a tene un reunion amplio pa sigui papia riba diferente detayenan manera Croes a sigura, unda nan a retoma algun topico “no ta un secreto cu SNBA tambe ta hopi envolvi den diferente desaroyo cu ta pasando aworaki y pa hopi biaha nan ta duna opinion como ATA riba proyectonan, pero tambe pa medio di e organisacion aki yega na e comunidad di San Nicolas y bisindario pa asina nan haya imput di comunidad prome cu lo ehecuta cierto proyectonan.

E MoU aki ta basicamente e formalisacion di varios componente, un topico tin di haber cu branding unda cu ya caba prome cu pandemia Croes a bisa cu nan a traha riba un branding specifico cu ta identifica San Nicolas, ta existi Aruba cu su marca y su imagen cu ta afo pero nan ta haya cu San Nicolas de acuerdo cu Forbes Magazine un plataforma internacional algun aña pasa a yama e area aki “E Capital di Arts pa Caribe” esey tambe ta exigi for di nan como ATA pa no solamente sigui traha riba e trayecto di sigui duna esaki contenido, pero tambe traha riba un branding cu banda di Aruba ta logra cu nan por posiciona San Nicolas di un manera diferente.

“Nos no ta mira solamente como un parti di Aruba y un ciudad cu ta duna mas realce na experiencia, e por converti su mes den hasta un punto di atraccion pa dicidi pa bishita Aruba y esey ta e ora mara na e MoU aki”, Croes a comenta.

E di dos punto ta cu nan lo sigui enfoca riba informacion na e bishitantenan, esaki ta pa medio di e Visitor Information Center cu lo continua cu su trabounan pero tambe cu diferente borchinan, atributonan monumental y cultural cu nan kier trece dilanti.

Un parti hopi importante cu Croes a trece dilanti ta cu mester reconoce tambe e otro instancianan cu ta hunga un papel hopi clave pa e parti di desaroyo di e producto, pensa riba e aspecto infrastructural akinan, e ta un topico cu ta delinea den e MoU aki y nan tabata papia tocante diferente proyecto cu ta continuando e aña aki.

Ademas, el a menciona cu Ministerio di Turismo ta hopi riba e proyectonan aki tambe igualmente colaboracionnan estrecho cu DOW y DIP como instancianan clave pa loke ta trata tipo di proyectonan asina aki.

Den e proyecto di Sero Colorado ta unda ATA ta integralmente envolvi, semanalmente tin trabounan cu ta sucede pa asina por logra cu esaki ta tuma luga, lo mira avancenan den e simannan cu ta sigui y lo sigui mira diferente apertura pa proyectonan cu ta bay inicia tendering, peticion pa ofertanan ainda e aña aki.

No mester lubida e otro proyectonan cu ATA tambe tabata envolvi na dje como e restauracion di e pier na Rodgers Beach y recientemente e trapi na Rodgers Beach e cual nan drecha y nan ta bay dun’e a toke artistico tambe. Pa aña 2023 lo sigui mira e continuacion di e proyectonan unda cu SNBA ta hopi importante.

E aspecto cultural tambe ta inclui den MoU aki, Art Fair cu ta un evento cultural ta di infrastructura tambe segun Croes a señala, pa motibo di tur e muralnan y tur loke a sucede e dianan ey ta visibel den area aki “sigur ta un intencion di ATA pa continua cu esaki pero tambe por pensa riba con ATA a inicia tambe e festival Carubbian y cu despues a bira Island Fest, loke tambe ta riba agenda pa otro aña pa loke ta trata e manera pa trece mas ainda movecion y cultura dilanti den e bario di San Nicolas”.

E parti di educacion y training ta den preparacion pa haci un miho trabou kisas mas informa den area di turismo cu ta mara tambe den proyectonan cu ta pipeline y pensa riba acomodacionnan pero tambe e maneho cu kier mira pa San Nicolas.

Esaki ta algo cu pa lo cual algun aña pasa nan a funda Aruba Excellence Foundation, den e fundacion aki ta resorta entre otro Aruba Certification Program (ACP) , Croes a sigura cu nan a inclui Aruba Excellence Foundation den e MoU aki asina wak kico ta e posibilidadnan pa duna mas realce na San Nicolas pero tambe pa kisas ki tipo di training specificamente lo tin necesidad pe mirando e desaroyo y unda San Nicolas ta pa loke ta trata e etapa di desaroyo.

“Un San Nicolas mester keda un producto diferente cu e area di Palm Beach pa nombra un area cu ta specificamente hopi turistico y esey ta netamente lo cual cu nos kier mira pa San Nicolas y esey por rekeri un otro tipo di training pensando mas riba aspectonan cultural pero tambe un tiki mas profundo den historia di San Nicolas y vecindario”, el a bisa.

Shadey Figaroa ken ta presidente di hunta di supervision di Aruba Excellence Foundation a trece dilanti ta boga pa un bon educacion y educacion corecto di comunidad di Aruba en particular pa esnan cu ta traha den e sector hotelero, e sector cu ta duna servicio.

“Ta hopi importante pa nos y pa nos comunidad ta bon educa corectamente over e historia di Aruba y aworaki cu tur e proyectonan andando pa San Nicolas nos ta super contento hunto cu ATA y SNBA nos por firma un MoU pa duna e trainingnan necesario pa e comercio y comunidad di San Nicolas, nos meta ta pa tin full San Nicolas 100% ACP certified y nos ta espera cu nos por logra esey hunto cu e partidonan”, el a finalisa.