Diahuebs mainta durante e conferencia di prensa di Minister di Turismo y Salubridad Publico, Dangui Oduber, CEO di Aruba Tourism Authority (ATA), Ronella Croes, tambe tabata presenta a splica kico ATA su papel ta, no solamente den e proyecto di Baby Beach, pero den diferente otro proyectonan cu ta enfoca ariba e desaroyo turistico di Aruba.
“Di parti di oficina di turismo ta un placer y un honor pa por contribui na un proyecto asina ki”, Croes a express refiriendo na ATA su envolvimento den e proyecto di Baby Beach. E CEO a splica cu for di 2014, scuchando e voz di comunidad, pero tambe teniendo na cuenta kico e bishitante, kico turismo tin mester di dje, ATA a tuma un decision clave di pone mas enfoke ariba e desaroyo di e producto turistico cu ta Aruba.
Banda di locual ATA ta haci primordialmente y internacionalmente, nan ta mas presente aki y el a remarca cu e ta spera comunidad por a nota esaki tambe. No solamente pa medio di facilita y haci posibel cu diferente proyectonan por tuma luga, pero tambe como un voz na mesa den diferente comisionnan.
Croes a enfatisa cu esey ta keda un aspecto hopi importante pa loke ta trata un futuro y un desaroyo duradero di Aruba su turismo. Den cuadro cu esaki tin diferente puntonan di enfoke cu el a menciona.
El a subraya cu ATA ta pone prioridad riba e playanan, e seguridad den zonanan turistico, e nivel di servicio y hospitalidad, pero tambe aspectonan cultural, naturalesa, medio ambiente y asina tin varios puntonan di enfoke, segun e CEO a indica, cu ATA ta trata di duna prioridad pasobra hopi ta papia tambe di un ATA cu por ta envolvi den diferente aspecto.
Papiando di Aruba su playanan, Croes a recorda cu algun aña atras ATA a facilita diferente otro proyectonan hopi importante mara na esaki. Entre otro e proyecto di e boeinan riba lama cu por wordo mira den diferente zona, e colocacion y mantencion di esakinan. El a destaca tambe e estudionan cu ATA a haci riba calidad di e awa. “Ta cosnan cu hendenan kizas no ta mira pero ta cosnan cu ta wordo usa pa por tuma decisionnan clave tambe”, el a bisa.
Algun otro cosnan cu Croes a menciona cu por mira cu ta refleha ATA su compromiso cu e desaroyo di turismo na Aruba ta por ehempel e palapasnan den diferente area cu a wordo restaura y mehora, “y asina nos por sigui enfoca ariba diferente proyecto”.
Pa e aña aki no tin solamente e proyecto di Baby Beach den planificacion, pero ATA su ekipo, Croes a remarca, ta trahando tambe riba por ehempel Mangel Halto, conhuntamente cu Parke Nacional Arikok pa mehora e area aki tambe, hacie mas bunita y sigur mas util pa esunnan cu ta haci uso di dje, no solamente e bishitantenan pero comunidad di Aruba tambe.
E CEO a subraya cu ATA ta facilita e proyectonan aki no solamente pa medio di nan expertisio den e tema di turismo, pero tambe pa medio di fondonan cu turismo mes ta genera y ta dicidi di inverti back den turismo. Pero tambe ATA ta forma parti di diferente comisionnan pa asina ATA su voz y e voz di turismo por ta presente
Dunando algun ehempel di comisionnan hopi clave unda ATA ta traha cu diferente otro partido, Croes a menciona e comision cu a duna conseho referente e topico ariba e maneho di uso di UTV’s, ATV’s y watersports y con por mehora esaki. ATA ta forma parti tambe di e comision di infrastructura y difernte otro comsionnan.
“Banda di facilita pa medio di expertisio y fondonan cu ta bin di turismo y ta bay back den turismo, nos ta participa y duna nos expertisio den difernete otro manera tambe. Tur esaki ta basa ariba difente estudionan cu nos a haci. Pues e liña cora di parti di ATA ta bay back na estudionan cu nos a haci”, el a agrega.
Tres estudio clave cu ATA a haci ta inclui un plan integral pa desaroyo turistico di producto Aruba traha na 2017. Nan a traha tambe un estudio di capacidad di carga pa Aruba y e di tres estudio clave ta enfoka ariba cua segementonan Aruba por desaroya y por sigui capitalisa for di dje economicamente teniendo na cuenta e capacidad di carga.
E tres estudionan aki, Croes a desraca, ta forma un parti integral di kico ATA ta trece na mesa tambe y asina nan ta sigui tene na cuenta otro estudionan y aporte di parti di comunidad y bishitantenan.
El a comenta tambe cu recientemente por a mira entre otro tambe un estudio caminda ATA a acerca comunidad y a puntra nan sentimento y opinion pa loke ta trata nan desaroyo. Tur esaki, el a indica, ta forma parti di kico ATA ta trece na mesa y tambe ta wordo tuma na cuenta door di tur e partidonan envolvi
“Di nos banda atrobe nos kier gradici pa e oportunidad y nos ta aplaudi di por forma parti di tipo di proyectonan asina y nos ta aplaudi e hecho cu ta duna prioridad na tipo di proyectonan asina cu ta importante pa nos turismo y tambe nos comunidad”, el a finalisa.
Di su parti Minister Oduber a gradici ATA pa froma parti di e ekipo di tur e proyectonan cu Gobierno di Aruba ta discutiendo. No solamente forma parti di e ekipo, pero tambe percura pa tin e financiamento necesario pa ehecuta tur e proyectonan aki. “Manera ta conoci gobierno no ta pasando den us miho momentonan, kiermen e fondonan aki ta hopi necesario y sin e fondonan aki ta bira imposibel pa por keda haci inversionnan den producto Aruba”, e minister a remarca.
