(EFE) – Ex-presidente Mericano y candidato republicano, Donald Trump (2017-2021) diaranson ultimo a celebra su prome mitin den aire liber cu un seguridad reforsa debi na intento di asesinato cu a tuma luga na juli ultimo.
E scenario cu a eligi e biaha aki tabata e ciudad di Asheboro, na estado clave di Nort Carolina y na unda Trump a ser protegi cu bulletproof glass cu a ser coloca rond di dje.
Maske tabatin medidanan di seguridad extra, na un momento di su intervencion el a bandona e luga protegi pa bay brasa un muhe di e publico cu tabata sinti malo cu su salud.
E acto a enfoca riba seguridad nacional y a probecha pa enfatisa cu Merca tabata mas fuerte bao su mandato y cu guera na Ucrania no lo a sigui si e tabata den poder: “Mi actitud tabata mantene nos pafo di e gueranan. Mi tabata stop e gueranan cu un yamada di telefon,” el a bisa.
Trump a ripiti su denuncia cu presidente actual, Joe Biden y vice-presidente Kamala Harris, “ta hibando nos cerca di e tres guera mundial.”
E ex-madatario tambe a papia tocante e promesa di construi un Cupula di Hero manera esun di Israel.
“Nos ta yuda Israel y otro paisnan . Ex-presidente Ronald Reagan tabata kier esey hopi aña pasa. E tabatin rason, pero na e momento ey nos no tabatin e tecnologia adecua. Awe nos ta conta cu un tecnologia increibel. Otro paisnan tin’e y e pais aki mester tin’e tambe,” el a bisa.
E magnate di New York di 78 aña, a resulta herido na su horea dia 13 di juli ultimo despues cu un hoben a dispara contra dje den un mitin na Butler, Pennsylvania. E agresor tabata riba e dak di un edificio cerca di e luga unda tabata celebra e acto politico, prome cu el a ser descubri pa forsanan di orden na unda el a mata un persona di e publico y otro dos a resulta herido.
E director di Servicio Secreto Mericano na e momento ey, Kimberly Cheatle, a renuncia na su funcion dianan despues debi na foutnan den seguridad di e evento y despues di a afirma cu e intento di asesinato aki tabata supone “e fout operativo di mas grandi” di e agencia den “decadanan.”
Siman pasa a bira conoci cu Servicio Secreto a aproba un plan pa aumenta seguridad di Trump cu ta inclui uso di glass bulletproof. Normalmente, e glass ey ta ser duna na presidentenan y vice-presidente ora ta considera necesario den aparicion den aire liber.
E aparicion di Trump di diaranson ultimo, e prome cu ta tuma luga cu e dispositivo nobo aki, ta marca un siman intenso di campaña den cual e hunto cu su candidato pa vice-presidente, senador J.D. Vance, ta purba contraresta e foco mediatico cu tin riba e Convencion Nacional Democrata na Chicago, den cual Kamala Harris a oficialisa su candidatura pa Cas Blanco.
