Tin un homber cu sa core rond di Aruba varios biaha y hopi hende kisas conoce e homber aki pasobra e sa core caba rond di Aruba como deporte. Sinembargo, e biaha aki, Omar Steba ta bay core henter un ronda rond di Aruba pa un bon causa y ta pidi pueblo di Aruba pa pone atencion riba esaki y apoya. Kisas bo a yega di mira Omar Steba na cant’i caminda ora bo ta coriendo riba e caminda di Savaneta bayendo ariba of biniendo di pabao. Tambe bo por a mire na diferente otro parti di e isla ta core of tin biaha riba su bicicleta. Omar Steba ta conta Bon Dia cu e tin hopi aña caba ta haci esaki como deporte y cu e biaha aki e la mira un oportunidad cu e por uza esaki pa un bon causa.
Mayan, diabierna 13 di Mei e careda ta inicia cual ta wordo organisa door di Mariniers Kazerne tur aña y sr. Steba ta bay tuma e oportunidad aki pa core rond di Aruba pa recauda fondo y yuda Casa Cuna cu 4 cama cu nan falta pa e muchanan.
Casa Cuna mester di cama pa e muchanan; Ainda no ta laat pa yuda!
Aunke cu ta un poco riba man pa motibo di dificultadnan inespera cu a presenta nan mes, di parti di Stichting Casa Cuna ta pidi pueblo di Aruba, comercio y cualkier otro instancia of compania cu ta dispuesto pa yuda pa tuma contacto cu Stichting Sportsz 4 U riba Facebook of riba number di telefon 592 2848 of haci cualkier donacion na e cuenta di banco di Stichting Casa Cuna na CMB, Number di banco: 102786610 ,Adres :Pos Chikito 4. Pa ora e careda caba, e siman despues lo anuncia kico tur a wordo recauda pa e instancia. E careda ta cuminsa riba diabierna 13 di Mei parti anochi na Mariniers Kazerne y lo caba bek atrobe na e mesun luga parti mainta.
