Ronchi de Cuba no ta un nomber desconoci na Aruba. E ta diseñador di moda, productor y director creativo di Trash by Ronchi y e ta un persona hopi stima pa comunidad di Aruba. Den un entrevista cu Bon Dia Aruba Ronchi ta conta di su trayectoria den e mundo di moda y con el a drenta den esaki.
Ronchi ta conta cu semper e tabata un mucha cu tabatin hopi creatividad y fantasia desde un edad relativamente hoben. Su difunto mama (qepd) dunele hopi amor y a siñele norma- y balornan pa por nabega e bida den un bon forma.
El a bay Reina Beatrix Basisschol y despues el La Salle College Mavo y despues a asisti International School of Aruba caminda e tabata parti di e prome klas cu a gradua di e scol aki. El a studia Fashion Design na Merca na International Fine Arts College cu aworaki ta conoci como Art Institute.
El a sigui conta cu su 18 aña el a produci su prome show di moda y ta danki na su creatividad y determinacion cu el a tuma e decision di drenta den e mundo di moda.
Den actualidad Ronchi ta exitoso den e mundo di moda y ta un di e diseñadornan mas renombra aki na Aruba, pero prome cu el a yega caminda e ta awe, el a encontra algun reto na caminda. El a splica cu na inicio hopi tabata esnan cu no a kere den dje of cu no tabata compronde. Fuera di cu el a scoge pa keda traha na un isla chikito caminda un profesion den moda ta basta dificil pa maneha.
Aworaki no solamente Ronchi ta un diseñador di moda, pero ta doño di su propio negoshi, tienda di paña tambe, Trash by Ronchi. El a conta cu el a dicidi di concentra den e mundo di moda y producion na 1991 tempo e tabatin 20 aña, pero desde hopi hoben e tabata sa cu e lo ta parti di un industria creativo.
Aruba ta un isla hopi chikito y manera den hopi profesion den e mundo di creatividad, profesionalnan ta scoge pa sigui eherce nan trabao den exterior, pero Ronchi a keda Aruba. “Mi a scoge pa keda na Aruba pa ta cu mi mama y su famia. Famia ta sumamente importante pa mi,” el a remarca.
Pero esaki no ta kita cu e ta conoci internacionalmente tambe. El a splica cu el yega di haci varios proyecto den exterior y tin plan pa ainda haci mas.
Hopi hoben cu ta aspira pa drenta den e mundo di moda ta mira Ronchi como un ehempel, un role model, pa su exito como diseñador. Ronchi tin mensahe specialmente pa e hobennan aki: “Ta autentico. No laga otronan influencia bo. Ta e capitan di bo biahe. No desvia y semper pa dilanti.”
Por ultimo, Ronchi tin tambe un mensahe special pa comunidad di Aruba en general: “Fe den Dios ta yuda hopi den bida. Trata di biba cu mas gratitud. Pensamentonan positivo ta trece cos bon den nos caminda. Biba mas den alegria y menos den amargura. Gradici pa locual bo tin y no desea cosnan di otro. Competi cu bo mes. Zorg pa bo awe ta mihor cu bo ayera. Esakinan ta locual mi mes ta aplica den mi bida y kier comparti cu e comunidad di Aruba.”
