Strea di futbol Brasileño retira, Ronaldinho a keda libera di aresto domiciliario dialuna, despues di pasa cinco luna deteni na Paraguay pa drenta e pais cu un paspoort falso.
Hues Paraguayo, Gustavo Amarilla a entrega un sentencia suspendi di dos aña den prison pa Ronaldinho y su ruman homber Roberto de Assis Moreira, y a duna nan libertad. E rumannan tambe lo mester paga un multa di $200mil entre nan dos.
Ambos a keda aresta maart ultimo pa posesion y uso di paspoort Paraguayo falso cu cual nan a drenta e pais pa conduci actividadnan di negoshi.
E strea di futbol retira anteriormente a keda libera di un prison di siguridad halto na Paraguay, pero a ricibi orden di aresto domiciliario na un hotel di luho mientras e tabata bou investigacion.
Ronaldinho lo por bay Brazil inmediatamente. Abogadonan di defensa Tarek Tuma y Alcides Caceres a bisa cu nan clientenan lo establece residencia na Rio de Janeiro.
Ronaldinho, un campeon mundial cu Brazil na 2002 y ex-strea di Barcelona, milan y Paris Saint Germain entre otro club, a cumpli 40 aña di edad na Paraguay. El a yega e pais riba invitacion di un fundacion local, supuestamente pa presenta su autobiografia, duna sostena na un scol pa mucha di menos recurso, y inaugura un casino.
Fiscal Marcelo Pecci a bisa cu Ronaldinho y su ruman a ricibi un proceso legal mas cortico pasobra ‘nan a admiti di tin documentonan legal oficial Paraguayo pero di contenido falso y pasobra nan a litiga di buena fe’.
Ronaldinho tambe a bisa autoridadnan local cu e documento tabata un regalo di un comerciante Brasileño, kende tambe a bay cera. A confisca paspoort Brasileño di Ronaldinho na cas pa motibo di un investigacion pa supuesto crimen ambiental, pero a debolb’e e documento na september. Un luna despues, el a hunga un partido amistoso na Israel.
E por a pasa cinco aña den prison.
