Ronald Van Trigt di Fundacion Impact Blue: ‘Desperdicio plastico ta drenta den locual nos ta consumi’

Fundacion di Impact Blue ta un organisacion pa haci estudio extenso riba ‘impacto di e ley pa elimina plastic’ pa preveni importacion di plastic cu ta uza un solo bes.

Presidente di hunta di Impact Blue Foundation, Ronald Van Trigt a duna un splicacion cu e meta di e fundacion ta pa crea un brug entre comercio y e vision di Impact Blue. Nan tarea como fundacion conhuntamente cu comercio ta importante pa comunidad.

Van Tright a splica cu Juliet Carvalhal ta e guia di organisacion cu estudio extenso den investigacion. “Cu un estudio impactante por a determina cu e [prohibicion di plastic di uzo singular] a resulta den 65.000.000 pida plastic menos cu a benta afo for di nos isla na 2018”, Van Trigt a comparti.

Segun Van Trigt, e impacto pa un isla chikito ta grandi. Como hunta di e fundacion nan ta sigui kere cu ta importante pa forma parti di sociedad. “Un grupo entre comercio, sector priva, gobierno y tambe cooperacion di esunnan cu a haci estudio, asina por crea impacto riba nos comunidad.”

Ta trahando pa haci estudio mas profundo riba e ley cu a introduci caba, pero tambe riba e proposicion di ley cu falta, ‘cu lo haci Aruba un luga unico den Caribe’. Di e forma ey nan ta purba di forma parti di solucion berdadero, aunke e problema di plastic rond di mundo ta grandi.

Segun Van Trigt, pa un isla manera Aruba ta un problema cu ta fuerte pa motibo cu Aruba ta un isla y rondona cu awa. 65.000.000 pida plastic ta un gran parti cu ta drenta den nos awa. E ta bisa cu e plastic cu ta deshaci, ta drenta den micro organismo cu na su bes ta drenta den cuminda y bebida cu nos ta consumi a base diario.

Sinembargo, un persona manera Carvalhal, cu ta haci estudio pa trece solucion, “E tin un vision pa haci diferencia y mustra kico por haci di forma positivo, pa haci un estudio cientifico y bin cu solucion duradero, pa nos isla y pa region.”

El a comparti tambe cu den estudio reciente, a menciona cu Aruba ta un di paisnan cu ta produci mas sushi, y cu desperdicio plastico ta un di nan. Den Caribe, Aruba ta cay den e top 10 di desperdicio, ‘un estadistica real’. E ta pensa cu ta importante pa bin cu mensahe di conscientisacion den gobierno, cerca boluntario y den comercio.

“Nos tambe tin responsabilidad pa contribui den locual ta afecta nos bida di awe, pero tambe pa e bida di nos yiunan y nieto. Cu mas tempo y contribucion di tur partner y comunidad lo tuma reto pa ataca e problema cu tin rond di mundo”, Van Trigt a finalisa ta bisa.