Tur trahado di Romar Trading mester ta vacuna. Asina Director Milton Harms a informa tur su empleadonan pa medio di un carta Dialuna. E maneho di vacuna obligatorio ta basa riba e responsabilidad di Romar Trading como dunado di trabao pa mantene su ambiente laboral liber di peliger pa su empleadonan.

E maneho ta dirigi na salvaguardia salud di empleadonan, nan famianan, pero tambe clientela y bishitante, contra e virus mortal COVID-19. Segun e carta di Milton Harms, e vacuna ta evita grandemente cu ta keda contagia cu e coronavirus.

“Como un di e distribuidornan mas grandi di nos isla nos tin contacto diario cu mas di 300 persona pafor di nos oficina. Ta nos deber pa ta e ehempel y trata di proteha nos empleadonan como tambe comunidad en general,” Harms a bisa.

Tur empleadonan tin e deber di presenta un prueba di vacunacion, tur dos dosis, contra COVID-19 prome cu September 6, 2021. E persona cu ta rekeri excepcion pa motibonan medico, mester entrega e prueba di dokter na ehecutivonan di Romar Trading. “Nos kier encurasha nos empleadonan pa vacuna mas pronto posibel. E empleado cu no ta vacuna completo (tur dos dosis) pa September 6, lo no por presenta na oficina y lo sigui pa e fase di terminacion di contrato laboral,” Director di Romar Trading a finalisa su carta.

Segun articulo 11 di Constitucion di Hulanda y articulo 8 di Tratado Europeo pa Proteccion di Derechonan Humano, no ta permiti pa obliga un persona tuma un vacuna, tampoco un dunado di trabao. Es mas, segun e leynan aki, un dunado di trabao no por ni puntra si un persona ta vacuna of no.

Bon Dia Aruba a puntra Sr. Harms si e ta consciente di e stipulacionnan aki y su contesta tabata simpel esta “nos kier duna nos trahadonan un luga sigur pa traha. Tin vacuna y mester us’e.” E empresario a bisa di lo mira si berdad lo tin hende cu kier entama caso contra su decision.

Mester bisa cu aunke e interpretacion di e ley Hulandes y Tratado Europeo ta cla, huristanan na Hulanda a cuminza cu e discusion si e asunto di vacuna ta un libertad of un obligacion. Segun e NJB, Nederlandse Juristen Blad di Juni 11, 2021, Corte Europeo pa Derechonan di Hende, EHRM ta considera vacuna comunidad como mas importante cu e obhecion di algun. Pa tal motibo mes huristanan Hulandes ta kere cu a bira tempo pa Gobierno di Hulanda cambia su maneho di laga hende scoge si ta vacuna pa uno unda ta urgi tur hende pa tuma vacuna.

Tabata e aña aki cu EHRM a bisa cu proteccion di salud publico ta trece cune cu por desvia di interes particular. Aunke e caso tabata referi na e vacunanan pa mucha, basa riba e obligacion cu Gobierno di Republica Checo a impone riba mayornan. E pais Europeo ta obliga tur mucha tuma vacuna, cu excepcion di esnan cu dokter ta bisa cu nan no por ricibi esaki. E articulo 8 di Tratado di Derechonan di Hende ta pidi tambe pa Gobierno haci esfuerso pa proteha bida y salud publico.

Bon Dia Aruba lo amplia riba e opinion huridico aki, skirbi pa Profesor Aart Hendriks, specialista den Derecho di Salud Publico na Universidad di Leiden, mirando cu e lo tin hopi relevancia awor cu e prome empresa na Aruba, formalmente a tuma e decision cu tur su empleadonan mester ta vacuna.