Director di Romar Trading den un entrevista cu Bon Dia Aruba ta divulga cu personal a horta un suma algo di 50.000 florin. Segun nos informacion ta trata di un estafa grandi cu producto y falsificacion di recibo.
Ministerio Publico ta confirma cu tin un persona deteni anto tin un otro sospechoso cu ta den libertad. Nan ta sospecha di fraude y falsificacion di documentonan. Nan ta laga sa cu e investigacion ta andando y esaki lo determina precisamente kico tur a tuma luga.
Bon Dia Aruba a comprende for di director di Romar Trading Milton Harms kende ta bisa nos cu nan ta esun cu a entrega e keho na polis. Segun sr. Harms ta na altura di dje, ta un solo sospechoso so tin te, e no a tende nada mas ainda for di polis of Ministerio Publico despues di entrega keho.
Otro compania victima
Sr. Harms: “Nos a detecta algun iregularidad tumando luga mas o menos un luna pasa, nos a investiga y reporta na autoridad.” E no kier a bay den detaye riba con grandi e fraude ta. Tin rumornan cu ta bisa cu e ta bay te na 200.000 mil florin horta. Segun sr. Harms esaki no ta e caso pero e ta bisa nos cu e suma ta algo ariba di 50.000 florin. E ta bisa cu e compania Trigas tambe tabata victima di esaki unda a horta mercancia eynan tambe. Bon Dia Aruba lo tuma contacto cu nan riba esaki.
Tratamento den corte di husticia
E sospechoso deteni a purba di tira culpa na otro empleadonan y gaña despues cu a wordo confronta segun sr. Harms. E ta bisa cu e ta contento cu husticia a actua basta lihe y gara e persona den cuestion den algun siman. Aworaki segun sr. Harms e proceso hudicial mester sigui cana caminda mester bay corte pa cobra e persona e dañonan.
