E banda legendario Rolling Stones ta e adicion mas recien na e evento coordina pa Lady Gaga, cu lo transmiti den varios television mundial y mayoria di rednan social, y den cual lo participa artistanan manera Paul McCartney, Elton John, Billie Eilish, Maluma, J. Balvin, Jennifer Lopez, Allanis Morissette, Andrea Bocelli y SuperM.
“Nos ta sinti honra pa e invitacion pa forma parti di e transmision for di cas, siguiendo distanciamento social”, e grupo a bisa den un comunicado.
Tur artista lo participa for di nan cas den un jornada cu ta pretende recauda placa pa e crisis sanitario actual, maske Gaga mes y director di WHO, Tedros Ashanom Ghebreyesus a anuncia siman pasa cu ya nan a recauda $35 miyon.
“Nos kier recauda e placa prome cu transmision. Ora nos ta en bibo, warda bo cartera, credit card y disfruta di e espectaculo”, Gaga a bisa durante e presentacion di e iniciativa, cual for di prome instante a centra riba donacion den man di empresanan grandi y lidernan mundial.
E evento lo cuminsa awe y lo ta dividi den dos parti. Prome un marathon inicial di 6 ora den cual artistanan di henter mundo lo actua riba rednan social. E cita lo culmina cu un gran concierto di dos ora cu streanan internacional cu lo transmiti awe nochi riba television Mericano for di mey anochi (00:00 GMT).
Resto di mundo lo por mira riba internet y ademas algun canal di television Europeo, manera BBC Britanico, a confirma cu lo pas’e durante diadomingo mainta.
Practicamente tur red social y plataforma di internet lo transmiti e evento, for di YouTube, Instagram, Facebook of Twitter te gigantenan tecnologico manera Apple, Amazon y Alibaba.
Lo tin espacio pa ritmonan Latino cu Juanes, Luis Fonsi, Maluma, Becky G, y J. Balvin, y hasta lo tin un tiki di Kpop cu participacion di SuperM.
