Ayera tardi a tuma luga e acto di entiero di e prome korpschef di nos cuerpo policial (KPA), Roland Wilbert Peterson, kende a fayece dialuna ultimo.

Durante e acto di entiero aki, cuerpo di polis di Aruba a duna tur honor na kende historicamente a bira nan prome kopschef, despues cu Aruba a logra su Status Aparte. E actonan aki a tuma luga tanto na cas funerario Aurora, y tambe na su ultimo luga di sosiego den santana na Sabana Basora.

Reconocimento
Vocero suplente di polis, Liliana Rasmijn a declara na Bon Dia Aruba cu nan a organisa un acto di entiero cu polis uniforma pa duna honor na e feliz memoria di sr. Peterson. E ta considera cu tabata un deber di e cuerpo aki, ya nan ta orguyoso cu sr. Petereson kende tabata nan prome alto comisario di polis di Aruba como pais.

Sra. Rasmijn a bisa cu e ta sumamente orguyoso cu aña pasa, den e mesun luna di december, nan a traha un video cu tur e alto comisarionan pa nan desea Aruba Bon Pasco y Bon Aña. E ta lamenta cu net un aña despues e mesun video nan a uza pa recorda sr. Peterson.

Alto comisario di polis, Dolfi Richarson a dicidi di organisa un acto di entiero cu tur honor oficial pa sr. Peterson, manera mester ta. El a declara na e matutino aki cu sr. Peterson a asumi un responsabilidad grandi como hefe di cuerpo di polis, ora cu Aruba a haya su Status Aparte na 1986. Nan a dun’e tur honor y acto protocolario, ya cu merecidamente sr. Peterson ta merece e elogio y reconocimento, ya cu e ta e ‘godfather’ di nos cuerpo cu nos ta conoce awe.

“Na momento cu Aruba a separa di Antia, e meneer aki a tuma encargo sin sa si e lo tin suficiente manpower of material.” El a agrega cu sr. Peterson e tempo aya a ‘keep the organization running’.

E ta haya cu danki na e determinacion di sr. Peterson pa tuma e reto aki, awe nos tin un cuerpo policial y nan tin cu sigui cu e herencia cu el a laga atras. E ta spera cu cuerpo policial por sigui desaroya su mes. E no tin duda di esey mirando e calidad di e personal. Nan lo percura pa sr. Peterson su soño di haci di polis un organisacion bon pa un organisacion excelente por sigui.

Recuerdonan
Un frase ta bisa cu ‘esun cu ta biba sin amigo ta muri sin laga recuerdo atras’, y sr. Peterson a laga hopi recuerdo atras, no solamente cerca su famia manera su ruman muhe Molly Anne Peterson y Ryan Peterson, kendenan a dirigi palabranan yen di hopi sentimento y bunita recuerdo di nan ser stima. Sino tambe cerca su colega y amigo, Alvin Nectar.

Sr. Nectar a bisa cu sr. Peterson tabatin hopi curashi ora cu polis a duna su prome paso como institucion independiente di Antia. Na 1986 ora Aruba a drenta Status Aparte, y polis como organisacion a perde mas cu 40 miembro cu a bay Antias. “No tabatin nada, nada mes…”

El a recorda cu su persona hunto cu sr. Peterson como nan korpschef y otro coleganan entre nan meneer Rasmijn y Ronny Nicolaas, nan tabata keda delibera te laat anochi riba e situacion cu e cuerpo di polis tabata pasando aden. “Pero nos a bringa y nos a sobrevivi pasobra ta nos pais,” sr. Nectar a bisa.

Un caracteristica di dje tabata no mucho papiamento y bay pa e meta y asina el a crea e fundeshi pa e cuerpo cu awe nos ta conoce. Sr. Nectar cu hopi emocion a recorda situacion cu cuerpo policial a pasa aden, y cu awe e mes ta sinti orguyo di e herencia cu Roland y otro nan a laga atras, y cu nan coleganan awor a tuma over. “Mi ta sinti mi orguyoso di nos korp cu nan a tuma over.”

Mentor
Comisario Truddy Hassell a bisa cu e concepto cu e tin di sr. Peterson ta esun di un ‘persona ehemplar y un persona integro’. Na momento cu sra. Hassell a yega di asumi algun di su funcionnan den cuerpo policial, el a yega di acerca meneer Peterson caminda di un forma calma e tabata dune conseho. Pero tambe el a dune apoyo y guia pa tuma e decisionnan corecto. “Pa mi e tabata un tipo di mentor,” el a bisa.

John Larmonie di e seccion di conscientisacion y prevencion di criminalidad di cuerpo policial a bisa cu sr. Peterson tabata un polis ehemplar durante su trayectorio den e instituto aki. Un recuerdo inolvidabel pa sr. Larmonie ta cu sr. Peterson tabata e korpschef cu el a huramenta su dilanti ora cu el a bira polis na aña 1988.