Recientemente formadornan, Gerlien Croes y Mike Eman, a reuni cu un organisacion cu su trabou ta enfoca den brinda ayudo y traha na bienestar di comunidad, Rode Kruis Aruba. Durante declaracionnan na prensa despues di e reunion cu formadornan, director di Rode Kruis Aruba, Stephen Daal, a splica con e reunion a bay y kico ta e puntonan di importancia cu a ser treci dilanti.
Daal a indica cu durante e reunion nan a duna un splicacion na e formadornan di kico e organisacion ta haci caba socialmente na Aruba.
Ademas di esaki, pa loke ta trata puntonan cu mas a resalta, preocupacionnan of aspectonan cu mester di mehoracion cu nan organisacion a trece dilanti durante e reunion, el a informa cu un di e puntonan mas importante cu nan a subraya ta un miho cooperacion cu e futuro gobierno.
Daal a indica cu un miho cooperacion ta consisti di e parti financiero y e parti di comunicacion cu diferente departamento cu ta atende asuntonan social na Aruba. “Nos ta boga pa tin un miho cooperacion cu tur e departamentonan. Nos ta bezig cu e departamentonan caba, ta bay tin combersacionnan andando y esey nos a caba di informa formadornan riba esey,” el a splica.
Pa loke ta e situacion financiero di e organisacion, el a splica cu nan ta depende di fondonan di tur caminda. El a sigui splica cu comercio ta duna fondo y Hulanda tambe ta duna fondo pasobra nan ta cay bou Hulanda, pero Gobierno di Aruba no ta duna fondo, cual ta un punto cu naturalmente tambe a ser treci dilanti durante e reunion cu e formadornan.
Pa loke ta aspectonan cu mester di mehoracion, Daal a indica cu semper tin caminda pa drecha. El a menciona cu tin algun aspecto, algun punto specifico cu mester sigui papia di dje, pero no tabatin suficiente tempo den e reunion pa papia den detayes riba cosnan cu mester mehora. “Asina cu gobierno sinta, e departamento of ministernan concerni lo adresa e tipo di cosnan ey na su debido tempo,” el a bisa.
Potret: Facebook Red Cross Aruba
