Rocky Kelly: Ban debati e pobresa di Aruba riba un nivel internacional tambe!

Rocky Kelly di Grupo 7 ta splica Bon Dia cu e no ta compronde pakico tin tanto ansiedad riba e tema di amienda di union civil si tin asina hopi otro tema pa debati cu ta mesun y te hasta hopi mas importante pa Aruba manera casonan di abuso di mucha y sin laga afo e pobresa silencioso.

”Dicon tanto ansiedadnan anto cu mester bay riba amienda cual ta un cos cu nunca a debati riba dje? Den Grupo 7 tambe nos ta basta dividi den e tema aki , locual cu mag y ta haci esaki un Democracia, pero loke ami personalmente ta bisa, ami no tin problema cu bo escogencia sexual, pero e idea no por bira asina cu bo por pone prioridad riba tur cos, con ta para cu e tema di abuso sexual di mucha, pobresa y tur otro tema cu kier desvia di dje?” , Sr. Kelly ta splica Bon Dia.

Sr. Kelly ta agrega cu ningun hende kier papia di abuso domestico, no kier papia di pobresa silencioso pa locual bo ta hereda trauma di dje. ”Si un mucha wordo abusa sexualmente, e ta hereda trauma pa resto di su bida e no ta hereda un cas of tereno. Abuso domestico despues di divorcio cu bo yiunan pasa den cosnan, kico bo ta hereda? Trauma.” Sr. Kelly ta bisa.
Den e caso actual di muchanan cu ta wordo abusa segun Sr. Kelly no ta haya un psycholoog, nan no ta keda cana cu e asunto manera cu mester ta. ”Nos lucha ta esey, Sr. Danies ta haci e un otro manera, e ta spuit te ora e haya atencion, nos ta sigui cu e lucha pa nos exigi pa esey haya prioridad. Sra. Lisette Gomez por ehempel tambe luchando pa 6 aña, el a lucha tambe na su manera, nos a para su tras na e manifestacion , Minister ta hal’e un banda y bis’e pa no deal cu tal grupo, anto ta net, net nada ainda a wordo haci pa nan casonan” , Sr. Kelly ta splica Bon Dia.

Pakico nos tin Parlamento si e no ta funciona drechi?

Segun Sr. Kelly, e parlamentarionan  ta dicidi cu nan ta duna prioridad na e personanan pa nan bay cambia un amienda pa nan por hereda cos, sinembargo con ta para cu e muchanan na Casa Cuna cu a perde casi 30% di nan subsidio? Con ta para cu e muchanan special y nos hendenan grandi cu tambe a bay atras cu segun Sr. Kelly, riba esaki nos parlamentarionan no ta pone prioridad na dje. ”Aki mi no ta papia di debate estilo comedia cu camara riba bo den parlamento pasobra e cos ey ta un show e ta. 
Ami ta papiando di un debate caminda nos por uza Cultureel Centrum,  mescos nan kier debati e cuenta di amienda di codigo civil aki riba un nivel internacional, mi ta bisa ban debati e pobresa di Aruba riba nivel internacional. Esey nos mester haci, ban debati riba e problemanan social di nos hendenan, nos ta den un reino Hulandes, dicon nos no ta haya e parti social cu ta coresponde un ser humano miembro di reino Hulandes aki? Nos tin gobierno, nos tin ministernan por cierto 9 di nan te hasta di mas nan ta, nos tin parlamento, e no ta funciona!” Sr. Kelly ta splica Bon Dia.