Rocco Tjon tocante Geschillenregeling: ‘Loke a cambia ta cu despues di tres aña lo evalua si e concepto ta e miho’

Ayera durante un conferencia di prensa cu e presidente di Parlamento di Aruba, Ady Thijsen, e lidernan di fraccion di MEP, AVP y POR, Rocco Tjon, Marlon Sneek y Marisol Tromp respectivamente, nan a splica con a bay cu e biahe cu delegacion di parlamento a haci pa atende e asunto di Geschillenregeling cu a ser trata dia 2 di juli pasa.

E motibo di e conferencia di prensa, Thijsen a bisa cu nan kier duna informacion di con e proceso a bay, kico a wordo dicidi y kico tin pa Aruba y otro paisnan di Reino.

Di e palabranan di Tjon, lider di fraccion di MEP, el a splica cu Geschillenregeling mester cumpli cu tres aspecto. E prome cu ta trata cu conflictonan huridico, e instancia mester ta uno independiente y na mesun momento e conseho cu ta duna mester ta imperativo.

Tjon a expresa cu e manera cu e ley a ser presenta originalmente no tabata cumpli cu – den nan concepto – tur e aspectonan ey. Tocante e diferente rueda di prensa cu e secretario di Estado a ofrece riba e concepto di ley aki, e tabata cla cu nan no lo bay desvia di locual el a entrega, pa motibo cu den su concepto ta cuadra cu tur e puntonan.

Pa motibo ey, e debate a cuminsa ora cu tur e delegacion a biaha na Hulanda y nan a logra haya aprobacion di diferente amienda cu a cambia e indole di e ley manera a keda presenta. Loke a cambia awor ta e incorporacion den e ley, cu tin un evaluacion determina cu despues di tres aña lo evalua si e concepto di ley, manera cu e ta aworaki, ta esun di mas miho.

Na e mesun momento, Tjon a bisa cu nan a haci otro cambio ‘hopi cardinal’ manera el a expresa, caminda cu den e ley original e paisnan Caribense den Reino lo mester conta cu aprobacion di e presidente di gobierno di Reino, den actualidad Mark Rutte, pa e por inicia e procedura pa e Geschillenregeling y esey no ta e caso na e momentonan aki.

Tambe, el a conta cu e paisnan Caribense mes por inicia e proceso aki y na e mesun momento tambe den e concepto di ley tabata simplemente bisa cu a base di ‘bezwaar redende belangen’ gobierno di Reino por desvia di e conseho cua bin door di e organo independiente. Aworaki a traves di un amienda a defini esey pa limita mas, y na e mesun momento incorpora cu si nan desvia pa un di e tres motibo menciona den e amienda, lo mester publica y argumenta e motibo cu ta haci esey.

Tjon a manifesta cu otro motibo cu nan por desvia ta si tin erornan di procedura cu solamente a ser cometi. Tambe a resalta cu den e concepto di ley original ta Raad van Staten, e departamento di conseho, ta e organo cu lo mester duna un conseho ora tin un disputa, pero esey a cambia pa motibo cu den concepto, tur hende a acepta esey y mayoria di e fraccion Hulandes tambe, pero esey no tabata lo corecto, mirando cu na inicio ya caba Raad van Staten tabata involucra den e proceso.

Awor a traves di amienda, Tjon a splica cu nan lo introduci un organo nobo cu lo duna un veredicto den e momento cu tin un disputa y tambe lo conta cu e presentacion di e paisnan Caribense.

Pa finalisa, Tjon a comenta cu esey tabata e cuater cambio den nan concepto basta grandi cu ta duna e contenido di e ley y ta trece e esencia di e articulo 12A manera cu lo mester ta.