Diahuebs mainta den Parlamento di Aruba a tuma luga un encuentro oficial caminda a duna informacion ariba e tema di COHO. Lider di fraccion di partido MEP, Sr. Rocco Tjon, a duna splicacion di con e encuentro aki a bay y di e cambionan positivo cu ta significante pa Aruba.

Durante e encuentro aki Sr. Tjon ta splica cu Minister President demisionario, acompaña pa director di departamento di finanzas y tambe e departamento huridico, a duna tur informacion completo pa locual ta trata COHO y ta señala cu e cambionan cu a wordo logra door di e team di negociacion ta hopi significante, teniendo na cuenta e puntonan di preocupacion di parti di e fraccion di MEP.

“Semper for di inicio e puntonan di preocupacion di parti di fraccion di MEP tabata e autoridad cu e entidad aki lo a haya, dus e COHO, pero tambe e diferente areanan riba cual e por ehecuta su tareanan y ‘kinan bo ta wak cu tin cambionan grandi cu a tuma luga, caminda nan no tin e autoridad aki mas, nan no tin autoridad pa designa mas, e unico hende cu nan por duna un designacion na dje ta e COHO mes, e minister di BZK, dus ya esaki ta cambionan hopi significante”, Sr. Tjon a bisa.

Otro cambionan importante cu a logra y cu Sr. Tjon ta splica ta cu COHO no lo por inicia proyectonan mas riba nan mes y nan no por forma parti mas di e sharesnan di e companianan estatal di Aruba. Banda di esey tambe, e nombramento di e miembronan di COHO, Aruba lo tin un rol significante den esaki a traves di e comision cu ta wordo instala y tambe si tin decisionnan cu ta wordo tuma cu parlamento di Aruba no ta di acuerdo cune, Aruba lo por apela esaki.

Sr. Tjon ta splica tambe; “Un cos hopi importante ta cu aworaki ta bay traha cu ‘performance indicatoren’, kiermen no ta asina mas cu si Hulanda pensa cu no Aruba no a cumpli y nan mes por dicidi esey, criterionan obhetivo aworaki defini, na cual lo mester cumpli cune, anto si cumpli cune, e ta pone un obligacion tambe riba Hulanda cu si cumpli, nan mester duna e siguiente fiansa. Kiermen e no ta keda mas libremente pa Hulanda tampoco”.

E ta señala tambe cu e ta wak cambionan hopi bon cu a tuma luga, hopi significante, pa loke ta e parti di supervision financiero cu a logra aworaki. E ta splica cu na prome instante Aruba mester a paga e financiamento haci cu Hulanda back den dos aña, aworaki a logra verspreid esaki over di 7 aña y a base di analisisnan cu a wordo presenta esey lo scapa Aruba 82 miyon florin.

E proceso cu ta sigui aworaki ta cu e concepto di ley lo bay wordo entrega na Raad van Advies y na Raad van Staten, 3 di september e lo pasa den Rijksministerraad y e ora ey e conceptonan aki lo yega Parlamento di Aruba.

Un otro punto hopi importante cu Sr. Tjon ta splica ta cu e posicion di Parlamento di Aruba a wordo reconoci y e posicion di parlamento ta wordo respeta. “Diferente partinan cu a wordo incorpora den e ley, manera si mester bin cierto puntonan, mester tin un vooraan procedure aworaki cu ta incorpora”, el a bisa. “Dus parlamento ta haya su debido tempo pa duna su opinion”.

“Tambe si pa x motibo scoge pa e ley wordo prolonga, paso despues di seis aña e ta caduca, pero si aworaki scoge cu kier prolong’e, prome tabata asina cu e gobierno di Aruba y e gobierno di Hulanda lo por dicidi esaki riba nan mes, aworaki no, si mester kies pa prolong’e e mester bay a traves di un ordenansa nacional cu mester wordo aproba den parlamento”, el a splica.

Un otro cambio ta cu aworaki cada tres luna e entidad COHO lo mester bin parlamento pa splica y duna informacion, y cu e concepto di ley cu tin aworaki riba mesa, Sr. Tjon ta bisa cu nan a tene cuenta cu practicamente tur e puntonan di preocupacion cu no solamente Parlamento di Aruba a señala, pero cu Raad van Staten tambe a señala, “dus nos ta wak e cambionan positivo y aworaki nos ta bay keda en espera di e ultimo consehonan cu ta bay bin di Raad van Advies y Raad van Staten, pa despues nos por fiha nos posicion final”, el a agrega.

Di parti di oposicion, aunke a mustra cu tabatin un gran argumento, Sr. Tjon ta bisa cu e oposicion a haci practicamente dos pregunta solamente y cu tur dos a wordo contesta en detalles tambe. “Un di preguntanan tabatin di haber cu e autoridad pa designa caminda nan a puntra si ta asina cu e minister di BZK por duna gobierno di Aruba designacion, y den detaye a splica e oposicion cu esey no ta e caso. E otro pregunta tabata si Caft ta haya mas autoridad aworaki, cual a wordo contesta cu esey tampoco no ta e caso paso for di 2015, na momento cu e ley di supervision financiero a bin na vigor y a introduci e organo di supervision, Caft ya caba tabatin tur e autoridad pa locual ta trata e presupuesto di Aruba, kiermen nada no a cambia den e aspecto ey tampoco.