Diaranson mainta a circula un informe cu tabata entre otro riba riba Facebook di parlamentario Sr. Dangui Oduber caminda tabata tin un supuesto razzia na KIA na unda diferente articulo a wordo confisca entre otro celularnan y hasta un mapa di escape. Segun Director di KIA, Sr. Rocco Tjon, ta haci razzia na KIA regularmente y esun aki tabata juist uno regular y nada di haber cu nada particular ni tampoco e video di Ex-Militar Reinier Koole.
Segun Director di KIA, Sr. Rocco Tjon, el a confirma na Bon Dia cu tabata tin un razzia anto cu en berdad esaki tabata e caso pero e no por a duna mas detayes ainda na kico tur a wordo confisca. E ta asegura cu esaki no tin nada di haber cu e video recien caminda Ex-Militar Sr. Reinier Koole ta mustra di yega hopi cerca di murayanan di KIA sin wordo detecta di siguridad. ”E ta parti di e maneho cu ta keda bin cu razzia paso esey tambe ta parti di e metodonan pa mantene e instituto sigur pa detenido y personal.” Sr. Tjon ta bisa Bon Dia.
Rumor di arma den KIA
Tin diferente rumor circulando cu tambe tabata tin arma cu a wordo confisca na KIA pero esaki tampoco no por a wordo confirma cu e director cu no tin tur detayes riba e parti ey ainda dus no por a elabora. Riba pagina di Facebook di parlamentario Sr. Dangui Oduber sinembargo, por a mira informacion cu a haya entre otro bala di arma di candela di 9mm, 25 celular y te hasta un mapa den e lugar den preparacion pa huida. Sr. Tjon ta bisa Bon Dia cu tur cos ta keto y lo trece detayes manera cu esaki ta posibel.
