Aña pasa, Parlamento di Aruba a ricibi bishita di Congreso Mericano y a reuni cu nan riba diferente topiconan relevante pa Aruba. Despues di esaki, a sigui explora e balor agrega cu un relacion structural cu Merca a base di Parlamento por tin pa Aruba. Ayera durante un reunion di Comision Central, unanimamente Parlamento a instala e comision nobo, cual ta ‘Vaste Commissie Noord-Amerikaanse aangelegenheden’.
Relacion cu Merca
Manera ta conoci, Aruba ta traha hunto cu Merca riba diferente tereno manera turismo, aviacion, economia y husticia djis pa menciona algun. Riba diferente di e terenonan menciona ya caba ta existi diferente ‘Memorandums of Understanding’ (MOU). Mirando e importancia di e relacion aki ta importante pa for di e plataforma di Parlamento fortifica e relacion cu Congreso Mericano. Den combersacion cu Minister plenipotenciario, sra. Mr. Joselin Croes e tambe a señala e balor agrega di fortifica e relacion pa asina capitalisa riba e ‘low hanging fruits’.
Tripartite overleg
Ta na Augustus 2019 cu e Parlamentonan di Corsou, Sint Maarten y Aruba a trata e topico aki tambe. Tur tres pais ya caba tin lasonan fuerte cu Merca riba tereno di Turismo, Siguridad y Economia. Mirando e desaroyo pa loke ta finanzas publico ta importante pa enfoca tambe riba e topico aki. Parlamento di Corsou a reuni cu miembronan di congreso Mericano. E interes pa tin laso mas fuerte no ta biba solamente cerca e Parlamentonan Caribense, pero esaki tambe a wordo vocifera door di ‘congressional Staffers’ cu a bishita Aruba.
Pa conclui
Pa Aruba esaki sigur ta importante mirando cu nos economia y turismo ta depende grandemente di Merca. Pa concretisa e relacion entre e islanan y Merca e Parlamentonan lo tene contacto cu consulado Mericano, congreso Mericano y e Ministernan plenipotenciario cu ta representa e islanan na Merca.
