Siman pasa e Cumbre di Ministernan di Husticia di Reino a yega na diferente palabracion di balor agrega pa Cuerpo Policial, Instituto Corecional y Cuerpo Especial Arubano.
Cooperacion pa material,curso y training.
A yega na palabracion cu lo structura y intensiva e cooperacion pa loke ta ‘overname”’ di vehiculonan y material specialisa pa KPA, CEA, brandweer y BOT/K9. Esaki ta sumamente importante ora tene na cuenta cu hopi biaha e intercambio ta pega door di burocracia.
Un otro decision importante cu e Cumbre a tuma ta pa e College van Korpschefs yega na un plan di cooperacion riba tereno di training y cursonan, conhuntamente cu Dienst Speciale Interventies. Esaki lo encera cu e teamnan di aresto lo sigui haya trainingnan specialisa. Un paso sumamente importante mirando e desaroyo actual den nos region.
Colaboracion cumbre y IPKO.
Durante e Interparlementair Koninkrijksoverleg (‘IPKO’) a dicidi pa urgi e ministernan di Husticia pa institui un Task Force cu lo bay inventarisa y bin cu recomendacionnan pa cu e circunstancianan di detencion den e institutonan penitenciario.
Nos ta satisfecho cu Minister di Husticia. A. Bikker a logra yega na un palabracion concreto riba e topico aki siman pasa. Esaki ta cuadra tambe den e plan cu tin pa yega na un instituto coreccional nobo, cual proceso ta avansando.
Pa conclui.
A base di e ultimo reunionnan Interparlamentario y e Cumbre di Ministernan nos ta wak con e dos plataformanan aki por complementa otro y yega na pasonan significante cu ta di balor agrega. Di e banda aki nos ta bolbe enfatisa cu nos ta satisfecho cu e trabounan desplega door di Minister di Husticia durante e ultimo reunionnan na Corsou.
