Robot por subi tereno dificil, yuda hende mantene protocol di distancia social, y hasta baila manera niun hende ta wak. Awo investigadonan a descubri cu nan por mustra indicacion di empatia.
Un estudio nobo di Ingenieria di Columbia, publica dialuna den Nature Scientific Reports, ta mustra con un robot a siña pronostica e accionnan futuro di su partner robot basa apenas riba algun imagen di video. “Nos hallazgo ta cuminsa demostra con roboto por mira mundo for di perspectiva di otro robot”, autor lider di e estudio, Boyua Chen a bisa den un declaracion.
E investigadonan a pone un robot den un playpen di alrededor 3×2 pia di tamaño. E investigadonan a programa e robot pa haya y move den direccion di cualkier cirkel berde cu por mira. Algun biaha e robot lo mira un cirkel berde den su bista di camara y move directamente den su direccion. Otro biaha, e cirkel berde tabata blokia pa un caha cora grandi, pues e robot mester a move den direccion di otro cirkel berde of no move en absoluto.
Despues di observa e otro robot move pa alrededor di dos ora, e robot observando por a anticipa e ruta di e otro robot. E robot observando eventualmente por a predeci e ruta di e otro robot den 98 di cada 100 biaha, den diferente situacion.
“E habilidad di e observador pa pone su mes den sapato di su partner, pa bis’e asina, y compronde sin guia si su partner por of no por mira e cirkel berde for di su punto di bista, ta talbes un forma primitivo di empatia”, Chen a bisa.
Mientras e comportamento cu e robotnan den e estudio aki a presenta ta claramente menos sofistica cu humano, investigadonan ta kere cu por ta e cuminsamento di dota robot cu e ‘Teoria di Mente’.
‘Teoria di Mente’ ta un teoria cu ta fundacional pa interaccion social exitoso. E teoria ta cu na edad di tres aña, humanonan ta cuminsa compronde miho cu otro humano tin necesidad y comportamentonan diferente. E teoria aki tambe ta esencial pa humanonan compronde interaccionnan social compleho manera cooperacion, competencia, empatia y decepcion.
Hod Lipson, profesor di ingenieria mecanico na Columbia y co-autor di e estudio, ta bisa cu hallazgonan di e team tambe ta presenta algun pregunta etico. Mientras robot ta birando mas inteligente y mas util, por yega un dia cu nan ta siña anticipa con hende ta pensa, y por siña manipula e pensamentonan aki.
“Nos ta reconoce cu robot no ta bay keda mashin pasivo cu ta sigui instruccion pa largo”, Lipson a bisa. “Manera otro formanan di AI [red. Inteligencia Artificial], nos ta spera cu legisladonan por yuda tene e sorto di tecnologia aki bao control pa asina nos tur por beneficia.”
E estudio, conduci na e Laboratorio di Mashin Creativo di Ingenieria di Columbia, ta parti di un esfuerso mas grandi pa duna robot e habilidad di compronde y pronostica e metanan di otro robot basa solamente riba observacionnan visual.
