Redaccion di Bon Dia Aruba, manera bisa den e articulo acompañante, a papia cu varios persona tocante nan experiencia (no positivo) te awor cu e proyecto FASE. Un di nan, di ken nos a mira tur documento necesario, tabata dispuesto di duna nos un entrevista, bao garantia di anonimato. Nos a dun’e e nomber Robert X cu e proposito ey.

“Mi a perde trabao na mitar di maart, ora cu e hotel na unda mi tabata traha via un uitzendbureau, a kita den un solo tiro tur hende cu tabata traha eynan via e bureau ey. Mi tabatin un luna ta traha eynan, cu e incertidumbre caba cu trabao di e forma aki ta trece cune. Pero mi tabatin basta tempo cu mi tabata busca trabao vast, desde cu mi a perde mi empleo anterior na otro compania. Mi speransa tabata cu via e trabao temporal aki, mi por a haya despues un trabao vast na e hotel, pero e crisis aki a dicidi otro. Na cuminsamento di april mi a yena tur cos y a aplica, y a carga speransa cu na fin di april sikiera mi por a haya algo pa combati mi gastonan di luna, pero nada.”

BDA: “Con bo situacion na cas ta? Cuanto boso ta pa biba di cuanto, awor?”

Robert: “ Nos ta tres den cas, mi casa y ami, y un yiu di mi casa cu ta bay scol ainda. E unico entrada cu nos a keda cune ta esun di mi casa, cu ta gana poco mas cu salario minimo. Pa colmo algun tempo pasa nan a corta su salario malamente na e lugar unda e ta traha, y Labor a haci net nada pa nan. Esey so nos tin anto, y no ta yega pa paga cas, luz, awa, cuminda, etc.”

BDA: “ Y kico bo ta haciendo mientras bo no haya nada di FASE?

Robert X: Mi no ta custumbra sinta warda te ora golpi coy mi curpa. Cu algun hende cu mi conoce nos ta haciendo un par di job cu ta pone algo riba mesa. Pero manera bo sa, den e situacion aki no tin tanto hende cu mester di un persona pa drecha algo na nan cas o cura. Ademas tin un monton di ilegal cu tambe a keda den preta, cu ta competi den e tipo di trabao aki. Y ya bo sa, control di gobierno riba e cosnan aki, nunca.”

BDA: “Y si finalmente bo no haya nada di FASE, con ta haci?”

Robert X: “Wel, loke m’a bisa bo caba; si mi no haya nada, nada no a cambia pa mi, pasobra mi tin basta tempo den e situacion aki caba. Ta na ultimo e trabao ey a bin salba mi, pero pa un luna so. Segun por, nos ta traha, dia tin, lo tin. Dia cu no tin, nos ta wak kico ta come. Mi no a yega na mi edad (52) pidiendo niun gobierno nada; mi no tin pakico di stens riba nan awor tampoco.”