Recientemente director di N.V Elmar, Robert Henriquez cu despues di casi 2 aña di trabou intensivo, a cambia mas di 12 mil luz di LED. Sr. Henriquez ta bisa cu e luznan LED ta uza menos coriente y ta duna mas iluminacion.
Na aña 2015 N.V. Elmar a cuminsa cu e proyecto cu un velocidad halto, cual ta un proyecto di 2 aña y pa reemplasa tur cos y haci expansion. “Nos ta riba schedule. Ya caba nos tin 11 mil pega di cual falta un mil y pico pa termina, pe proyecto ta cla”, sr. Henriquez a duna di conoce. Segun e schedule e trabounan lo keda cla pe luna di november, pero aworaki nan ta basta adelanta, un relato di e compania di coriente ta duna di conoce.
Segun e relato, sr. Henriquez ta contento cu e trabou di e empleadonan, pasobra nan presentacion ta hopi bon. Desde comienso di aña te cu awo, nan inhaalmanoevre tabata hopi bon. Esey a pone cu awo tin e resultado cu 11 mil lampi instala di LED. Loke cu falta ta un parti chikito di cual ta e parti di luznan oraño, unda ya tin palabracion cu DOW y DTI pa mira con lo cambia e luznan oraño den e parti innovativo.
E resultado di e proceso di destaho publico a resulta exitoso, di cual N.V. Elmar a ricibi hopi reaccion. A percura pa scoge e miho cu tin, cual ta un compania Canades di LED, Roadway Lighting. N.V. Elmar a yega na un bon acuerdo cu e compania di Canada pa reemplasa tur e luznan aki na Aruba y haci nan LED. E cantidad di luz existente cu mester cambia ta 9000, pero awo no ta asina y ta cambiando 12 mil luz. Compara cu e luznan bieu, e luznan aki LED ta percura pa spaar casi 30% den uzo di coriente.
N.V. Elmar ta pendiente pa finalisa y e director ta mira cu e proyecto aki ta uno exitoso. “Aruba completo lo conoce solamente luznan di caya trahando a base di tecnologia avansa di LED. No ta solamente cambia e luznan, pero tambe cu N.V. Elmar por comunica cu e luznan unda nan por mira via computer si e luznan ta cendi den oranan di anochi. Tambe nan por monitor diferente factor via computer”, e relato ta finalisa bisando.
