Robert Candelaria na Rocco Tjon: Debati riba casonan penal ta metemento den husticia! MEP tin cu para keto y wak con e setup contra AVP ta yega cas bek

Diabierna ultimo, durante un entrevista radial, Lider di Fraccion di MEP, Rocco Tjon a invita Robert Candelaria di e Fraccion di AVP, pa un debate na radio riba e caso Avestruz. El a bisa di no kier bay den detaye di e caso sino riba e procedemento penal cu un caso asina ta trece cune.

Ambos Parlamentario a ocupa e funcion di Altoinspector di Polis y como tal conoce e trayecto penal bon. Sinembargo, Candelaria no ta mira necesidad pa bay debati cu esun cu a entama e caso contra un ex Minister di AVP, specialmente awor pasobra cu kier kita atencion debi cu e caso a tuma un rumbo cu MEP lo no a desea ora a entama e caso na husticia.

“Rocco Tjon mester por ta corda, tempo nos tabata traha e trabou di Polis, cu no por duna informacion riba casonan penal andando pa no stroba investigacion. Obviamente nada a cambia den esey. Awor pa specula den un debate riba un caso, cu pa falta di detayes (di mi banda) lo ta un eror mas grave ainda, posiblemente strobando husticia mas den nan trabou. Pues, ami no ta bay debati cu Sr. Tjon riba ningun caso penal cu e mes a entama contra contrincantenan politico”, asina miembro di Parlamento, Candelaria a anuncia den fin di siman, den un entrevista haci dilanti edificio di Parlamento.

Mas leu e Parlamentario a vocifera cu “Mi ta supone si, cu e ta bastante nervioso awo, pasobra e investigacion a tuma un otro rumbo di locual e lo a spera of desea. En bes di enfoca riba contrincantenan politico, ta obvio, si mira e sospechonan y e adresnan unda Polis a haci inval, cu ta hendenan masha “yega” na e Gobierno na mando. Pues, e investigacion no ta riba ex Minister Sevinger, sino riba tur tres ex Minister, incluyendo esun actual”.

Candelaria a aclaria cu e no por papia di un investigacion cu e mes no ta conduci, ni tampoco cu el a entama. Cu si tin metemento di politica den e caso, e no a, ni ta bay comenta pasobra e no kier stroba e investigacion ni purba atacha e imagen di “nos” Ministerio Publico. E ta referi na “nos” pasobra e ta di nos tur; E mesun poder hudicial cu ta (mal)uza awe pa persigui mandatarionan, ta e mesun lo uza despues contra e mandatarionan actual. P’esey mester tene masha cuidao ora uza husticia pa batayanan politico pasobra e ta un cuchiu cu ta corta ambos banda!

Robert Candelaria a confirma su confiansa total den nos aparato hudicial, pasobra el a bin di eynan, el a traha eyden y a expresa cu si un dia e haya confiansa di comunidad, cu e lo percura pa haci’e un aparato hudicial ainda mas miho, ainda MAS obhetivo y ainda mas eficiente.

“Pa e caso aki, ban hunto duna husticia e espacio necesario pa nan maniobra y opera, memey di nos Trias Politica, sin metemento. Ta basta caba cu e mesun Rocco Tjon y Endy Croes tur siman ta ataca Ministerio Publico pasobra ainda nan no a haci nada. E unico cos cu awor cu nan a actua, no a bay den e direccion desea pa MEP, sino a tuma un direccion neutral y pa investiga tur! Cu e caso Avestruz aki, ta tur ex Minister y esunnan actual ta bou di lupa pa maneho di tereno riba nos isla”.

Di acuerdo cu e miembro di Parlamento pa Fraccion di AVP, e locual e gusta di un investigacion ta cu no solamente e lo persigui y hiba culpabelnan dilanti un Hues pa huzga nan, sino cu e lo saca e inocentenan tambe for di e luz di culpabilidad y di manchamento di nan bon nomber. Esey ta bon pa tur hende, pasobra lanta tur dia cu contrincantenan politico ta acusa Bo di tur sorto di cos, tambe ta un sorto di “castigo”. Esey en todo caso lo mester stop asina cu un Hues dicta un veredicto. Corda cu tambe ta existi e posibilidad ainda cu Fiscal na final lo dicidi pa no persigui ningun hende mes, si e nota cu no tin un base penal den e acusacionnan haci of si e pruebanan presenta no ta suficiente. Tambe por pasa, y a yega di pasa, cu debi na pruebanan nobo obteni den e investigacion, cu ta amplia e caso mas ainda y ta persigui otronan cu no tabata sospechoso na un principio, cu despues ta bira sospechoso!

Pesey na final Robert Candelaria a informa Rocco Tjon: “Miho nos no ban debati ainda y purba colga hendenan di AVP di acusacionnan haci dor di MEP, pasobra tin algun sospechoso awor cu ta liga directamente na MEP y POR cu ta den e mesun caso aki. Corda kico Nel Oduber a siña nos: Het kan verkeren!”