Awe mainta a tuma luga tratamento den Parlamento “Ley di Codigo Penal” cu ta un ley cu a inicia den e periodo di gobernacion di Mike Eman y cu ta un ley sumamente importante cu ta regla pa Ministerio Publico, pa polis riba kico ta e autorisacion legal cu nan tin na momento di efectua investigacion.
E Ley sigur ta uno cu mesora a haya sosten di AVP, pa motibo cu e ta e mesun ley cu lo trata na Corsou, Sint Maarten y na Aruba. “E ley aki ta duna nos un gusto grandi como nos ta e prome pa pasa esaki, pero en espera cu na momento cu e pasa na e hermana islanan e lo pasa den e vision cu partido AVP tin.”
Na momento cu miembro di nos Cuerpo Policial bay Corsou huramenta, traha of igualmente esnan di e islanan bin akinan pa traha, lo demostra e colaboracion cu tin pa traha hunto, y cu esaki lo ta posibel, trahando cu e mesun ley, mesun autorisacion y esaki sigur ta un desaroyo sumamente positivo.
Robert Candelaria tambe ta comparti cu e ta importante pa tene cuenta cu criminalidad ta algo cu ta sigui desaroya y ta pa e motibo ey tambe e ley tin cu desaroya hunto cu ne, si ta posibel un poco su dilanti mes. Ta kere cu e trayecto cu a encamina hunto cu profesor Den Doelder, parlamentarionan di gobernacion anterior, profesionalnan di field di ministerio publico, di cuerpo policial y di corte cu awo akinan tin un bon producto di ley cu lo facilita e autoridadnan hudicial e hermentnan necesario pa haci nan trabou.
Den un mundo cu ta desaroya na un nivel hopi rapido, esaki ta yuda pa nan tambe cana cu tempo y sigui tene e paisnan mas sigur. Un pabien pa Aruba y nos mundo Hudicial.
