Preocupante ta locual cu ta pasando actualmente durante crisis. Minister di Husticia ta insinua cu tin jaloezie riba dje mientras cu e unico cos cu e tin ta dealnan straño cu e tin cu bay duna cuenta. Por a tuma nota di insinuacion riba baha gasto di proyectonan PPP di parti Bikker den su ultimo conferencia pero e pueblo por a duna testimonio di unda tur a beneficia di cada proyecto cu ta den gran uzo durante temporada di Shelter in Place por ehempel caminda a comunidad a sali y recrea/haci deporte y por a mishi cu nan.

Robert Candelaria ta remarca riba e hecho cu ta papia cu tin cu bay paga pa nan, igualmente tin cu bay paga pa locual cu por aprecia tumando luga na Dakota caminda un construccion y preparacion pa containernan ta den marcha.

Unda e prioridadnan di e gobierno actual aki ta?
Como Parlamentario ta su trabou pa controla Minister y su Gobierno pa tene nan skerpi. Como tal ta na su luga pa haci pregunta di cual merece contesta. Con por ta posibel cu den un periodo manera awo, cu scolnan sin opcion pa habri bek pa falta di wasbak pero na e momentonan aki ta haya aun minister ta hinca miyones den containernan pa cera personanan ilegal riba nos Isla.

Un inversion irealistico caminda tin cu hinca placa den compra di container cu no ta den bon condicion, paga pa drecha nan, converti nan den cel pa por fungi como localidad di detencion, tin cu bay paga pa siguridad incluyendo overtime pa cuida e hendenan ilegal como tambe suministra e presonan aki cu cuminda (3 biaha pa dia) sin lubida riba seguro medico si cualkier un di nan por ta sufriendo cu un of otro problema medico.

Cuater scol no tin edificio pa nan mientras ta inverti den prioridad robes.
Tur esaki tumando luga mientras scolnan ta confrontando problema pa habri ( wasbak, bentana kibra y mas ) ta locual cu segun Candelaria ta cuestionabel. Mientras ta keda inverti den prioridadnan robes, tin actualmente cuater scol cu no tin edificio adecua pa nan por muda bek y fungi manera mester ta. Pero si ta prepara luga cu containernan pa cera hende. Sin lubida cu ta cera hende awo akinan pero no tin fecha cu nan Pais lo ricibi nan back, indicando cu tin cu bay sigui paga tur e gastonan aki. Scoge pa inverti den e scolnan y habri nan bek no tabata opcion!

Enkelband pa detenidonan ta un opcion pa e Minister “Pragmatico.”
Como cu e ta un Minister Pragmatico, cu solucionnan pragmatico e por usa e solucion pragmatico cu Robert Candelaria ta comparti. Haci uso di enkelband. Por tuma contacto cu colega Grapperhaus na Hulanda bis’e cu lo tin mester di enkelband, cu tin problema cu ilegalnan na Aruba y si esaki ta posibel cu e por yuda cune. Pero no ta opta pa esey, ta prefera di paga pa containernan cu no ta den bon condicion, inverti hopi placa pa drecha nan y tur otro gasto menciona mientras no mester. Tin otro solucion mirando cu tin prioridadnan mas importante.

Un apelacion un biaha mas na e Minister, si acaso ta bisa cu no por sali di contractnan anto “Play Open Card” mustra pueblo e contract di container manera esun di helicopter tambe ( cu por cierto niun hende a mira ainda ), tin un contract cu a bay corecto y transparente y cu no tin mucho gasto envolvi y cu a scoge esaki prime cu a opta pa drecha scolnan y habri nan back.

Tin cu mustra Reino/ Hulanda y bo mes un Pueblo cu a scoge pa pone bo eynan cu bo ta trahando cu prioridadnan corecto. Poniendo e cosnan cu mas prioridad prome y esnan di menos prioridad despues, cual na e momentonan aki no ta mirando segun Robert Candelaria.

Importante di tur esaki ta cu aki un par di siman tin cu bolbe bay cerca Hulanda, bolbe haci peticion pa fia placa mientras Hulanda ta bay cuestiona kico abo a haci / unda abo a corta gasto. Como ehempel por duna cu si bo tin un yiu cu ta pidiendo placa, e ta drispidi y no ta tuma maneho di placa na serio logicamente tin cu yuda e yiu maneha e placa of no ta dune placa mas. P’esey tin cu mustra cu ta un partner serio den Reino, cu ta haci huiswerk, a baha e gastonan cu por logra sin nan prome cu sigui haci peticion na Hulanda.

Prioridadnan no ta corecto y como Parlamentario y representante den pueblo su trabou ta di cuestiona locual ta sinti cu no ta corecto pa asina trece claridad cu pueblo por biba cune, Robert Candelaria a bisa.