WILLEMSTAD – Recientemente e comerciante Robbie Dos Santo a entrega peticion pa asina retira 178 empleado. Esaki ta despues cu Dos Santos intento pa tene e cuentanan bancario habri cu resultado envano.
E banco Maduro & Curiel’s a laga Dos Santos cay despues di ta su cliente pa 32 aña. Gerencia di e banco a bisa cu Dos Santo tabata tin te fin di maart ultimo y despues di esaki nan no kier ningun transaccion di Administratiekantoor Dollar NV ni di Robbie Dos Santos mas cerca nan, pero esaki a ser alarga te cu fin di april venidero.
Segun Banco Maduro, Robbie Dos Santos ta den negoshi di loteria y ta cay bou di e categoria di cuentanan di riesgo. For di april 1978, Dos Santos tabatin MCB Bank como su banco principal na unda e ta deposita cen y haci negoshi via di su cuentanan. Mayoria empleado di Dos Santos cu ta traha den loteria tambe ta cobra via di MCB. E “banco amigo” a manda bisa Dos Santos pa cera su cuentanan y busca otro alternativa.
Segun e abogado di Dos Santos den asuntonan civil, Bertie Braam a splica cu wega di number na Corsou ta un negoshi local cu ta wordo controla pa Fundacion Wega di Number Corsou. E abogado a mustra den corte cu MCB mester cumpli cu exigencianan di banconan internacional corespondiente y netamente esey awor aki tin e relacion cu Dos Santos den problema. Pero segun Braam, e banconan corespondiente no tin nada di haber cu transaccion nan local y pa tal motibo no tin rason pa cera cuenta di Dos Santos. Aparte di esey su cliente no ta partisipando den niun labamento di placa via di su negoshi. MCB a pone Dos Santos den un posicion dificil cu nan decision. Ta trata di e compania na Corsou Dollar Administratiekantoor cu ta bende loteria. Na St. Maarten e sucursal di MCB, Windward Islands Bank a haci mescos.
