E aumento di casonan activo di SARS-CoV-2, e virus cu ta causa e malesa di Covid-19, ta eherciendo presion riba e hospitalnan di islanan CAS, segun un reporte recien di Departamento di Salubridad Publico di Hulanda, RIVM.
Durante siman di 12 pa 18 di augustus ultimo, 1,501 persona mas a ricibi un resultado positivo di un test di coronavirus. Alrededor di 55% di nan ta na Aruba.
E aumento di e variante Delta cu tin varios siman ta domina na islanan CAS (Corsou, Aruba y St. Maarten) y tambe Bonaire ta preocupante, segun RIVM. E siguiente variante mas comun tras di Delta ta B.1.631, comunmente detecta na Colombia, cu ta representa 13.3 porciento di muestra na Bonaire.
Na Aruba, 663 persona pa cada 100mil habitante a ricibi un resultado positivo pa test di Covid-19 siman pasa, un aumento chikito compara cu e siman anterior (631 pa cada 100mil dia 11 di augustus). Cada biaha tin mas mucha menor di 18 aña ta contrae e virus. E cantidad di ingreso den hospital ta aumentando alarmantemente lihe. Segun DVG, ayera tabatin 83 persona interna den hospital, di cual 14 na ICU na Colombia. Dia 11 di augustus a hospitalisa 40 persona, casi un 43 porciento menos. E cifranan di ingreso den hospital ta mustra, segun RIVM, cu desde inicio di e di cuatro ola, 82 porciento di ingreso den hospital, 87 porciento di infreso den ICU, y 77 porciento di fayecido relaciona cu Covid, ta persona sin vacuna.
E cantidad di fayecido relaciona cu Covid tambe ta aumentando na un ritmo preocupante. Siman pasa, 8 persona a fayece na Aruba a causa di Covid-19. A haya un tasa di mortalidad semanal comparable pa loke a mira pa ultimo biaha na april di 2021 (siman 14). Aruba ta conta cu medidanan di salubridad publico for di dia 12 di augustus ultimo. Bida nocturno y barnan ta cera, uso di tapaboca ta obligatorio, y scol a keda cera te dia 1 di september.
