Restaurant Blossoms a perde su caso contra Aruba Hotel Enterprises (AHE) cu ta explota hotel RIU Antillas. Banda di esaki nan tin un boet grandi colgando riba nan cabes ora di keda sin cumpli di duna dato financiero.
Hues a dicta su sentencia ayera. No ta conoci ainda si Blossoms ta bay apela e veredicto aki, nan mester dicidi prome cu 28 di november.
E partidonan ta den un conflicto momento cu AHE a notifica e restaurant cu lo cera e hotel riba 28 di februari 2014 pa motibo di un renobacion grandi. E momento ey e hotel ainda tabata carga e nomber Westin. AHE no por a indica e tempo ey cuanto tempo e renobacion lo tuma pero a bisa cu nan ta dispuesto pa asina Blossoms por keda habri y lo limita e molester.
Blossoms a bay di acuerdo cu esaki y a indica cu nan lo perde entrada pa motibo di e molester di e renobacion y tambe cu lo spera hopi menos cliente pa motibo di e ceramento di e hotel y casino. Asina nan a pidi pa un miho areglo.
Un otro aspecto tambe a hunga un rol grandi den e conflicto: e accionnan di AHE a bay pa un otro compania Infinity View asina cu nan lo cambia e hotel pa uno all-inclusive di e cadena RIU. Esaki tampoco a cay bon cerca e restaurant y nan a entama un caso, exigiendo 1.7 miyon florin na daño.
E caso sumario aki ya a tuma luga y hues no a dicta na fabor di Blossoms pa motibo tambe cu e restaurant no mester a paga huur durante e periodo di renobacion. Y den e acuerdo di huur no a menciona algo cu ta prohibi renobacionnan sea cambio di e hotel pa un all-inclusive.
Asina Corte no ta haya cu AHE a actua inhusto. Al contrario nan hasta a bin cu un proposicion pa Blossoms pa e restaurant por keda y opera den nan concepto di all-inclusive. Nan a garantisa un cierto cantidad di cliente unda nan ta compensa e restaurant cu 15 dollar pa cada cliente. Sinembargo Blossoms a bisa cu pa e suma ey nan no por gana placa y lo conduci na mas perdida.
Boet di miyon
Un punto interesante den e caso ta cu e restaurant si a viola e acuerdo di huur pa motibo cu nan no a cumpli cu e parti di e contracto di suministra cifranan financiero anualmente pa AHE. A base di e cifranan aki, specificamente e ‘gross operating revenues’, AHE tabata determina e suma di huur. Blossoms tabata tin e obligacion pa entrega nan prome 15 di maart pero no a cumpli. AHE a pidi y extende varios biaha e deadline pero na final e restaurant no a cumpli.
Awor hues ta bisa cu e restaurant ainda mester cumpli cu esaki y duna e cifranan di e periodo 2009 -2014. Pa cada dia cu Blossoms ta keda sin cumpli, lo mester paga un boet di 5000 florin, te un maximo di 1 miyon florin.
Hues a rechasa tur demanda di Blossoms. E ta sugeri pa e partidonan ta sinta na mesa pa regla e futuro pasobra e restaurant ainda ta habri y operando den e hotel. Corte ta haya cu AHE ta den su derecho pa termina e contracto, manera nan a haci riba 9 di augustus 2014.
