E cadena hotelero RIU tin dos hotel na Aruba y ambos a sali diferente biaha den noticia como cu nan ta duna trabou, directo sea por medio di contratistanan, na stranheronan cu no tin un permiso pa traha. Sinembargo e director di RIU Juan Blanco ta bisa awor cu awor nan tin un control frecuente riba esaki.

E director ta informa cu na e dos hotel nan tin 150 stranhero trahando cu tin nan permiso na ordo. E ta admiti cu tabatin problema cu trahadonan ilegal ainda, te mas cu un aña pasa ainda, como cu nan ta trahado di contratistanan cu RIU ta duna cierto trabou manera construccion. Pero awor desde aña sr. Blanco ta bisa cu awor tin un control for di nan departamento di recurso humano structural riba esaki. Cada dos siman nan ta pidi un lista di e contratistanan cu e copia di e permiso unda mester indica te ki fecha e permiso ta valido.

“Mi no kier nenga cu nos tabatin un reputacion negativo pa cu trahadonan ilegal. Pero awor mi ta dos aña den e posicion aki y mi traha pa mehora esaki mas lihe posibel.” E director ta mustra Bon Dia Aruba e-mailnan for di su computer unda por mira e listanan.

Beneficio di all-inclusive
Un otro punto cu e director ta consciente di dje cual ta biba den comunidad, ta cu e hotelnan di RIU ta all-inclusive y cu esaki no ta duna suficiente bek na e economia y comunidad local. E percepcion ta, segun e director, cu nan ta importa tur cos directamente for di exterior, manera cuminda y bebida, y asina no ta stimula e economia local. “Mira aki, mi ta mustra bo e recibonan. Bo mes por mira cu nos ta cumpra for di companianan local so. Wak cuanto nos ta cumpra tur siman y luna.” Bon Dia Aruba a haya un bista amplio y por constata cu e hotelnan berdad ta cumpra for di companianan locual di importacion sea cu ta produci na Aruba mes. Companianan manera Caribbean Overseas, Aruba Trading, Carex, Casa Haime, Del Mar y Compras. “Mi ta compronde e sentimento cu hende tin cu all-inclusive. Sinembargo nos cadena ta otro y bo ta paga 500 dollar y mas pa un anochi. E huespednan tin suficiente placa. Pa nan come afo no ta algo cu nan no por paga, mirando e prijs di anochi di nan camber. Y nan ta haci esey tambe. P’esey nos tambe tin den nos lobby un stand di Aruba Gastronomic Association cu informacion di tur nan restaurantnan.”

Hotel nobo di RIU na Aruba?
Pero e director Blanco no kier bay mucho mas den e discusion di restriccion di all-inclusive cu recientemente a pas den forma di ley na Aruba. Pe e discusion no ta relevante mas. Ora Bon Dia Aruba a puntra si RIU kier habri un hotel nobo na Aruba y den e contexto aki lo ta willing pa cumpra Hilton Aruba, e ta bisa: “Mi tabata sa cu e pregunta aki lo bin. Wak nos no ta bisa no na un hotel nobo. Pero manera esaki, bo ta papia di un inversion di 350 miyon dollar. Y pa awor nos ta keda cu e dos.” Ta basta tempo caba cu tin rumor cu lo bende Hilton Aruba pa RIU. Ya caba e cadena tabata interesa momento cu Radisson a dicidi di bende e hotel. Pero finalmente Aruba Growth Fund a bira e doño y a trece Hilton. Aruba Growth Fund a nenga recientemente cu nan ta den proceso di bende e hotel. “Absolutamente no”, Rene Kan di e fondo aki a bisa Bon Dia Aruba.