Pa motibo di kier mantene costo di negoshi abou, e cadena di hotel RIU a disidi di cuminsa refill boternan di alcohol den mini bar. Esaki ta locual por conclui di un caso di corte cu a tuma lugar 9 di november 2016 caminda cu un trahador a hiba e hotel corte ja cu a wordo kita ‘op staande voet’ pa motibo di no sigi instruccion di gerencia.
Ora un persona yega un hotel y esaki tin un minibar, automaticamente e pensamento di e huesped ta cu tur producto di consumo cu tin poni disponibel ta nobo. Locual ta(bata) pasando na e hotel RIU ta completamente diferente. Trahadornan a haña instruccion pa refill boternan huza pa un cliente anterior y pone esakinan bek den e minibar pa aparenta cu ta algo nobo. Cu e desicion aki, e hotel no solamente ta engaña su huespednan pero tambe ta expone nan na malesanan cu ta wordo transmiti oral y ademas ta bay contra leynan di higiena.
E CASO
E trahador cu a keda perhudica ta(bata) den funccion manera Mini Bar Supervisor. Parti di e trabou ta encera pa asegura e cumplimiento di normanan relaciona cu suministro di e mini bar. Dia 15 di juli 2016, e trahador a nenga di firma e ’post controle sheets normativas del mini bar’ pa motibo cu sigun e informacion skirbi riba e papel no ta cuadra cu e berdad. Corte di promer instancia (GEA) a duna e trahador rason y ta enfastisa cu un dunador di trabou no por exigi pa un trahador pone su firma riba un documento cu ta mal informa e cliente/huesped. Hues a declara e desicion di gerencia nulo y ordena pa e trahador retorna na su trabou, den e mes un posicion cu e mesun beneficionan. Alaves RIU mester paga e trahador tur e dianan cu e la keda sin cobra, cu aumento di e interes legal y estautorio desde 15 di juli 2016 te na momento cu e relacion di trabou yega na su fin legalmente. Si no cumpli cu esaki, e trahador por exigi 500 florin pa dia te na un maximo di 100mil florin.
Bon Dia Aruba lo tuma contacto cu departamento encarga cu higiena pa un reaccion riba e tema aki.
Click AKI pa lesa full e sentencia.
