Diasabra cu a pasa, Fiscalia di Peru a haci un entrada hudicial na cas di ex presidente di Peru, Alejandro Toledo (2001-2006), pa busca informacion relaciona cu acusacion cu Toledo a haya 20 miyon dollar, pa faborece negoshi di empresa Odebrecht, manera prensa a revela na ultimo momento. E corantnan ‘Perú21’ y ‘RPP Noticias’ a publica documento hudicial, unda nan ta sigura cu ex director di Odebrecht na Peru, Jorge Barata a confesa di paga soborno na Toledo, pa construccion di dos etapa di caminda Interoceanica na Peru.
Den un entrevista di corant “El Comercio” na Paris, Toledo a nenga “absoluto y rotundo” e posibilidad di haya placa di banda di Odebrecht pa dun’e e trabao di construccion di muraya di etapa 2 y 3 di caminda Interoceánica.
Odebrecht a paga 29 miyon dollar na soborno na funcionario entre 2005 y 2014, tempo cu tabata na mando e gobierno di Alejandro Toledo (2001-2006), Alan García (2006-2011) y Ollanta Humala (2011-2016), na Peru, documento cu Odebrecht a firma hunto cu Departamento di Husticia di Merca a bisa.
