Rio de Janeiro – Desde 2002 te awe, shete persona, como promedio, ta muri diariamente di forma violento na ciudad di Rio de Janeiro. Den e periodo aki di 15 aña, tabatin 38.000 homicidio segun un investigacion di G1 (O Globo) basa riba datonan di ‘Instituto de Segurança Pública’ (ISP).

Nan ta tanto polis como criminalnan morto den enfrentamento, hende cu ta biba den e areanan domina pa cierto faccion di banda di miliciano o traficante, morto den bringamento, victima di ladronicia o di bala perdi, entre otro caso. Hende cu a bay para te den un tristo estadistica, di cual e sistema hudicial no a logra resolve mas di 10% di tur caso.

Datonan di Conseho Nacional di Ministerio Publico (CNMP) ta mustra cu di 6.073 investigacion inicia na 2009, apenas 150 a bira denuncia den corte, ocho aña despues di nan inicio. Te awor 1.512  a ser archiva. Otro 40 a drenta categoria “descategorisa”, o sea cu nan no ta homicidio mas y ta pasa pa categoria di intento di homicidio, loke a ocasiona nan retiro di Tribunal di Jury y a hiba e proceso pa un hungado criminal. Di e total, 4.371 caso ainda ta bao investigacion.

“E situacion ta hopi frega. Nos tin victima di tur banda y estado lo mester pensa awor den un cambio di postura. E guera contra droga manera ta hacie solamente ta resulta den morto. Asina ta 20 aña caba, 30 aña, y kico nos ta mira ta gobiernonan cu ta cumpra mas arma y vehiculo nobo. Nos a para pa pensa caba un rato ta ken ta gana cu esaki? Un hende mester ta ganando. Estado mester comprende cu e mester preserva bida. Mi no ta logra mira un futuro miho si hende no cuminsa traha riba un cambio di postura,” e sociologo Klarissa Platero, di Departamento di Siguridad Publico di Universidad Federal Fluminense (UFF) ta bisa.

Aumento atrobe di  violencia
Despues di un caida durante e prome decada di e siglo nobo aki, e cantidad di caso di homicidio a bolbe crece na Rio. E ta coincidi cu e caida di e proyecto di Unidadnan di Polis Pacificador (UPP), e mayoria di nan awor bibando e aumento nobo di e confrontacion entre polis y traficante, ademas di e abandono di e programa di meta, cu a yuda den aumento di productividad policial.