E alcalde di Rio de Janeiro, Marcelo Crivella, y e presidente di Riotur, Marcelo Alves, a defende ayera e presencia di forsanan di siguridad federal den e ciudad durante carnaval. Na momento di atende e asunto durante e presentacion di e programa di carnaval, e alcalde a bisa cu e kier a haci un apelacion na gobierno federal.

“Ta necesario pa nos tur por conta cu e tropanan federal prome, durante y despues di nos carnaval, pa nos carnaval, y tur e personanan cu ta riba caya por ta garantisa di ta alegre, feliz, cu Rio de Janeiro lo ta completamente sigur, sin cualkier espacio pa imprevisto”, e alcalde a declara.

E presidente di Riotur a bisa cu e peticion ya a ser haci oficialmente y cu alcaldia lo ripiti esaki. “E ta fundamental. E tropanan federal tabata na e Olimpiada (di 2016) pa un evento di 800.000 persona. Ora bo reuni 6 miyon persona, ta mas cu necesario pa haya e apoyo federal.”

Agentenan priva riba caya

Alcaldia a anuncia tambe cu ta bay contrata un empresa di siguridad priva pa opera cu 3.375 agente riba caya y na e Arena Carnaval Rio 2018, cu lo funciona na e Parque dos Atletas, na Barra da Tijuca, den parti sur di e ciudad.

Segun Marcelo Alves, e agentenan ta bay traha sin arma y complementando e trabao di Polis Militar y di Guarda Municipal. “Nan ta personal di un empresa cu lo wordo eligi via licitacion oficial,  pa hende por sinti realmente e percepcion di siguridad na luga di e acontecimentonan grandi aki.”

Divulgando e expectativanan pa e carnaval di e aña aki, alcaldia di Rio de Janeiro a bisa di spera e participacion di 6 miyon hende na e baile, parada y desfilenan di e scolnan di samba programa na e ciudad. E evento total mester inyecta como R$ 3,5 biyon (mas di 1 biyon dollar) na economia di e municipio.

E ciudad mester ricibi den e periodo aki 1,5 miyon turista, y yega na casi 90% di e grado di ocupacion den sector hotelero.

Marcelo Alves a afirma cu e carnaval di 2018 lo yega na un publico record. Segun e, e evento a logra capta e balor mas halto den patrocinio den historia, cu R$ 38,5 miyon (13 miyon dollar) cu a bin di empresanan manera Ambev, Uber y Dream Factory.