E aña aki temporada di horcan ta exigi mas atencion y cuidao. E ta uno particular na 2020 teniendo na cuenta cu nos ta confronta un crisis causa pa e pandemia di coronavirus/Covid-19.

Director di Rampenbureau, Rino Hermans a bisa cu e situacion aki no ta uno alarmante pa nan, pero si e ta un punto di atencion. A pesar cu pais Aruba ta den un situacion financiero preta, Hermans a aclaria cu nada a cambia cu e plan anual cu nan ta implementa den e temporada di horcan.

Dos siman pasa departamento di gobierno a bay na shen porciento, entre otro DOW cu ta encarga cu e mantenemento di e rooinan y sistema di riolering. Independiente cu pais Aruba tin reto debi na situacion financiero, esaki no ta kita afo e trabao di preparacion y deber di gobierno pa proteha su comunidad. “Eyden no tin cambio den nos maneho pa preparacion pa horcan. E ta continua normal,” segun Hermans.

Sinembargo tin prioridad cu a wordo poni. E prioridad ta poni pa scapa bida di hende y scapa infrastructura. Hermans a indica cu den caso aki nan no ta tene cuenta categoria di horcan, sino loke un fenomeno manera un tormenta tropical ta produci den yobida, y e consecuencia di inundacionnan. Principalmente ya cu segun modelo y pronostico traha pa medio di computer, ta indica cu dos fenomeno atmosferico eventualmente lo haci su presencia den e area di e islanan ABC.

Temporada di horcan y Covid.
E hecho cu nos ta den un crisis di pandemia, e departamento concerni pa atende cu crisis y calamidad ta bin trahado pa tres luna debi na e Covid.

E ta un team solido caminda e mesun funcionario ta bin trahando hunto durante e ultimo lustro. Hermans ta haya cu esaki ta un punto positivo pa Aruba cu nos por tin hendenan cu experiencia cu a yega di participa na 2017 pa sostene St. Maarten.

Durante e temporada di horcan, un aspecto di salubridad cu mester tene cuenta ta cu despues di un awasero ta wordo presenta epidemia di dengue, debi cu nos tin presencia di e sangura aki (Aedes aegypti), cu tambe ta transmiti Zika y Chikunguña.

Hermans ta haci un yamado pa pueblo mes coopera pa evita criadero di sangura haciendo limpi paden y pafo di nan cura di cas. Ya cu si nos ta haya un epidemia di dengue ta pone un presion riba nos sistema di salubridad. Esaki nos mes por evita e tipo di situacion mas molestioso aki, considerando cu nos no sa ki tempo e pandemia di Covid ta wordo controla mundialmente.

Igualmente el a laga sa cu a pesar cu cada un di nos tin un plan familiar, no mester lubida cu ta importante pa duna e instancianan publico y crisis team nacional di Aruba su rol. Hermans a enfatisa cu na momento cu ta sali un instruccion di gobierno, ta pasobra e profesional y expertonan a analisa y priorisa tur e necesidad y accionnan cu nan tin cu tuma pa protege bida y infrastructura na Aruba.

E cooperacion ta relevante den direccion di purba di mitiga cu despues di awasero nos lo haya un epidemia di dengue y otro malesa transmiti pa sangura. E kier recorda henter nos comunidad cu nos ta keda un isla cu un capacidad minimo. Nos tin un hospital y tambe tin un pandemia mundial, y instruccion ta pa cuida e capacidad di hospital. Si nos ta yuda y coopera gewoon eliminando y evitando criadero di sangura, e ta un paso importante pa mitiga e chens di por haya otro epidemia na Aruba cu por pone presion atrobe riba nos sistema di cuido.

Rampenbureau lo sigui conscientisa pueblo hunto cu media pa asina nos por confronta e retonan grandi cu 2020 a trece pa nos tur.