Ringweg of drecha enseñansa?

Recientemente nos a haya un mensahe di nos minister encarga cu Enseñansa, cu e lo mester alrededor di 280 miyon florin pa drecha tur e infrastructura escolar. E mandatario tabata mustra den direccion di un proyecto den forma di  ‘PPP’ pa esaki. Na mita di aña pasa caba e mandatario a trece e asunto aki dilanti y den e editorial aki nos a comenta tambe riba e topico.

Den e mesun periodo, CAFT a comenta riba e uzo di e concepto di PPP pa financia obra grandi di infrastructura, cu responsabilidad financiero final di gobernacion. E conclusion tabata cu e magnitud di e proyectonan PPP te na e momento ey, compara cu nos Producto Interno Bruto (PIB; GDP) tabata representa como 19% di GDP. Cual ta hopi mas halto cu e averahe di 4% den nos region. Hunto cu un debe publico directo di como 4000 miyon florin (> 80+% di GDP), esaki ta crea un situacion financiero imposibel pa e proximo decadanan. Den e sentido ey por a bisa cu e tempo ey caba e proyecto di enseñansa tabata mustra mas simpatico, y talbes cu mas prioridad cu un Green Corridor of un ringweg na Playa, pero si ta pa aumenta e peso cu nos mester carga caba di proyectonan ya den ehecucion, esaki lo ta simplemente demasiado.

Aparte di e consideracion aki, nos ta kere cu e suma ta mustra chikito pa tur cos cu lo mester haci pa realmente drecha tur cos den enseñansa. Pensa por ehemplo cuanto scol no tin infrastructura adecuado pa educacion fisico, den forma di un gymzaal cu su ekipo apropia. Nos no sa e cifra exacto pero ta trata di mayoria di scol. Esey lo significa cu e proyecto manera e mandatario tin pensa lo no cubri esaki tampoco y cu esey, den e comunidad cu tanto problema di mal nutricion, obesidad, y falta di actividad fisico, ta keda imposibel pa mehora e inicio na e scolnan basico.

Tuma na cuenta tambe cu nos no a ni toca aspecto di contenido di enseñansa, cu ta e problema mayor cu nos tin. Manera a señala di varios banda caba, drecha infrastructura riba su mes no ta bay salba nos enseñansa. Si no bin accion pronto pa atende e puntonan clave cu ta hibando nos na e hundimento total di e calidad di contenido den henter e sistema di enseñansa. Pero mas cu tur cos den nos enseñansa basico, lo bay dura varios decada prome nos reconstrui un enseñansa no tremendo, pero sikiera aceptabel.

En todo caso, loke si por ta sensato ta laga un di e proyectonan PPP menos prioritario cay y uza e financiamento pa un proyecto di enseñansa. Di esunnan cu mester drenta fase di construccion ainda, ta e ringweg ta e candidato mas importante pa no ehecuta. Den pasado reciente a trata e topico ringweg tambe den e editorial aki. Den e articulo ey a argumenta cu e ringweg a cuminsa su bida como un contesta pa e problemanan den futuro den e area di Playa, pero mas di cuarenta aña pasa. Na e momento aki e ringweg no lo pasa rond di Playa, pero den e aglomeracion existente panort di e ciudad. E no lo bay yuda pa descongestiona trafico cu ta drenta o sali di centro di ciudad, cu ta keda uza e careteranan principal cu ta core entre e centro y e periferia grandi cu a surgi den e cuatro decadanan ey. Loke si ta necesario ta e comunicacion directo entre aeropuerto y Paradera, pa crea un ruta pa e area di hotel cu no ta pasa den ciudad.

Tambe ta importante crea un alternativa pa e trafico escolar. Nos no ta ripara con keto nos camindanan ta mainta y merdia ora e scolnan ta cera? Ta berdaderamente necesario cu practicamente tur mayor ta hiba y busca nan yiu personalmente cu nan auto? No ta posibel pa organisa servicio di bus pa cada districto cu ta hiba e muchanan te cerca di nan cas? Pakico nunca nos ta tende di idea o iniciativa pa descongestiona e trafico, en bes di pensa solamente den infrastructura super caro? Nos no ta sigur, pero a garantisa nos cu nos ministerio di Infrastructura no tin solamente experto den trafico, nan ta hasta ‘verkeersdeskundige’.  Anto ban pone manos a la obra pa cambia nos manera di pensa na luga di ta canta ‘aleluya’ cada biaha cu bin cu otro plan cu ta na prome luga un monumento cu e mandatario di turno kier pa por hiba su nietonan bay admira despues. Riba esaki nos mester gasta nos placa?

Pa bolbe riba e plan di enseñansa: casi cuatro aña pasa e ministro cu a entrega e batuta na e actual mandatario, a defende su maneho cu tabata orienta mayoritariamente riba drecha edificio, cu “bo no por duna les mientras cu fan ta kita cay riba muchanan”. Nos ta casi cuatro aña mas leu y cu eleccion den porta, nos ta mira cu e sucesor no a drecha tanto y ainda ta pone infrastructura escolar na prome luga? Y di contenido? Con ta para cu ‘getting the priorities straight’?