(NTN24) – A traves di Ministerio di Transporte, Gobierno di Colombia a firma cu Argentina y Portugal un convenio pa e reconocemento reciproco di e rijbewijs di e nacionnan aki.
Cu e acuerdo, tanto ciudadanonan di nacionalidad Portugues como Argentino lo por wordo registra e documento na Colombia, y e Colombianonan tambe por haci esey na Portugal y Argentina.
Entre Colombia y Portugal a wordo acorda cu e dos pais a haci un acuerdo pa “reconocemento mutuo di rijbewijs dirigi na turistanan y bishitantenan cu hospedahe di duracion cortico”. Sinembargo, Gobierno Colombiano a indica cu ta bay busca amplia e medida pa residentenan permanente den un siguiente fase.
Di su parti, e convenio cu Argentina ta stipula cu “cada pais lo reconoce e rijbewijs nacional emiti pa autoridadnan competente di otro parti, na fabor di e titular di e rijbewijs cu residencia den nan teritorio cu nan por ta cu fin turistico”.
Pa loke ta trata residentenan permanente den teritorio aki, e rijbewijs lo tin un vigencia te e fecha concedi pa Estado di origen, mientras cu pa ciudadanonan den calidad di turista, e documento ta bay conta cu un vigencia maximo di 180 dia.
Segun Guillermo Francisco Reyes Gonzalez, minister di Transporte di Colombia, “danki na e firma di e acuerdo aki ta bay beneficia cerca di 9.000 Colombiano, cu di manera temporal por circula riba teritorio Argentino, asina como tambe 3.500 Argentino cu ta mobilisa na Colombia”.
Tambe, el a destaca cu pa loke a wordo acorda entre Colombia y Portugal, actualmente tin 958 Colombiano na e pais ey y 504 Portugues na teritorio Colombiano cu por wordo beneficia cu e acuerdo aki.
