(AP) – Rihanna tabata sinti cu e si e lo bolbe escenario menos di un aña despues di duna luz na su prome yiu, e lo mester ta un presentacion cu nunca el a haci antes. “Si mi ta bay keda separa for di mi yiu, mi ta bay haci esaki pa algo special,” e ganador di varios Grammy a conta The Associated Press den un entrevista.
Anteriormente e cantante a rechasa di presenta na e Halftime show di aña 2019 demostrando solidaridad cu Colin Kaepernick. Sinembargo den un entrevista recien prome cu su show “Savage X Fenty Show Vol.4,” Rihanna a bisa cu e tempo y circunstancianan e biaha aki ta corecto pa su persona. “E ta un desafio cu mi a duna bon bini. E escenario ta uno mas grandi di cualkiera cu mi a yega di presenta riba dje,” el a agrega.
Despues di e anuncio di NFL cu Rihanna lo ta e presentacion principal durante e show di February, rumornan a cuminsa plama cu speransa di ricibi un album nobo, cual e tin varios aña ta duna pista di e posibilidad di esaki. Su ultimo album, cual tabata titula “Anti” a keda lansa den aña 2016.
Aunke e gran celebridad recientemente a lansa su prome cantica den 6 aña, e cancion principal pa e pelicula Black Panther: Wakanda Forever, rapidamente el a desmenti e comentarionan cu e presentacion na Super Bowl ta nifica cu un album nobo ta cerca bisando cu “esaki no ta berdad. Super Bowl ta un cos. Musica nobo ta otro cos. Boso a tende?,” el a agrega cu “e momento cu mi a anuncia mi presentacion mi a bisa, ‘awo nan ta bay kere cu mi album ta biniendo. Mi mester sigui traha,’” el a conta.
