Richard Kramers, despues di perde un par di caso den corte, dialuna 9 october 2023 un biaha mas a bolbe perde otro caso contra minister di Husticia, Rocco Tjon, pa obliga di pon’e back como director interino di Guarda Nos Costa (GNC). Hues a rechasa su peticion. Bon dia Aruba ta keda cuestiona Kramers su integridad tanten cu no haya ningun contesta.

Caso di 9 di october cu Kramers a bolbe perde
 Atrobe Kramers ta bolbe perde su caso y no ta manera un otro medio di comunicacion a trece dilanti, indicando cu “el a gana tur su caso.” Den esaki por compronde cu e medio local ta mal informando comunidad den e caso aki, mirando cu Kramers a perde dos caso tras di otro y hues ta dicidi cu e no por bay back den funcion como director interino di GNC mas. Un sentencia di un hues ta keda valido ni cuanto opinion of noticia falso kier mustra.

Kramers a argumenta na corte cu e ta experenciando daño creciente den su reputacion, carera y na su rechtpositie, ademas di e desbentaha financiero – pero segun opinion di hues, Kramers no por a demostra ningun caminda cu e ta den un emergencia financiero cu ta afecta su persona.

Ademas Kramers mes ta declara cu e funcion di GNC a ser duna na Gino Winklaar cu nombramento. E nombramento di Winklaar no ta parti di e proceso di 9 di october 2023, unda hues a bisa por ultimo cu e nombramento di Kramers na GNC como director interino no ta bay door mas y ta rechasa su peticion.

Richard Kramers su tempo na GNC
Kramers como director ta e prome hende cu ta pone Aruba riba mapa negativo di Amnistia Internacional cu e caso di e hoben Venezolano, Maykol Chavez. Ademas tambe a yega di priva e libertad di tres mucha menor di edad den instalacionnan di GNC sin un base legal. E tres menor di 12,14 y 17 aña a keda cera den cel y mester a sigui e indicacionnan manera tur preso den Guarda Nos Costa mester haci. Esaki ta implica cu e muchanan a keda cera den cel cu nan mama for di 6:00pm te cu 8:00am; entre 8:00am pa 10:00am nan por a sali un rato y despues nan ta bay cera back. E muchanan aki a drumi riba vloer y a keda cera dos dia ilegalmente sin ningun orden di detencion ni un base legal huridico, algo cu ta contra tur derecho fundamental, tratado internacional y hasta e mesun Constitucion di Aruba.

Menor nan di edad deteni na GNC sin base legal / Secuencia di e proceso
 Segun e orden hudicial (bevelschrift) di dia 22 di augustus 2020, minister di Husticia y Seguridad, Andin Bikker a duna orden pa e mama di e tres menor di edad keda den detencion na Guarda Nos Costa.

E mesun dia, e mama di e muchanan a haya un meldingsplicht (met werkverbod); dia 31 di augustus 2020 pa 4:30pm nan ta bolbe detene e mama di e tres menor di edad.

Pa 2 di september 2020, e mama ta presenta dilanti hues comisario M. Soffers pa determina si e detencion tabata den cuadro di ley.

Sentencia di Hues Comisario Soffers
 Pa sorpresa di hues comisario, na e momento ey el a haya sa cu e tres mucha menor di edad tambe tabata den detencion hunto cu nan mama na FOL. E no tabata na haltura di esaki antes, pa motibo cu e orden di detencion cu a presenta na hues comisario tabata dirigi na e mama so, no na e muchanan. Sinembargo, na e momento ey, hues a haya sa cu e muchanan tambe tabata cerca hunto cu nan mama.

Durante e tratamento di e caso, director e tempo ey, Richard Kramers a bisa hues comisario cu e decision di bin cu e muchanan na Guarda Nos Costa tabata den consulta cu Voogdijraad pa interes di e muchanan, y segun e ex-director a señala, e muchanan no tabatin cuminda ni luga pa drumi.

Den tratamento tambe, e ex-director a purba di hustifica na hues cu “no por papia di un detencion of di privacion di libertad pasobra e muchanan por a cana libremente paden den edificio di Guarda Nos Costa na FOL.”

Na dado momento e hues comisario no por a sigui scucha e argumentonan di e ex- director di Guarda Nos Costa mas, y hues a draai y splik’e cu “na e momentonan aki cu e muchanan no por sali for di e instalacionnan di Guarda Nos Costa, legalmente nos ta papiando di privacion di libertad pa locual ta rekeri di un base legal.”

(“Nu de minderjarigen GNC niet kunnen verlaten is er sprake is van vrijheidsbeneming waarvoor een wettelijke grondslag nodig is.”)

Pa motibo cu ni GNC ni minister di Husticia no tabatin un base huridico y un bevel di inbewaringstelling cu cual mester a cera e muchanan na GNC, privacion di libertad di muchanan ta totalmente contra tur ley, hues comisario a duna orden pa e libertad di inmediato na e tres mucha menor di edad.

Caso Maykol Chavez: Kramers a declara na Landsrecherche algo y na Gobernador di Aruba a declara cos cu no ta cuadra cu realidad
Dia 13 di juni di 2022, un redactor di Bon Dia Aruba manda un carta na su Excelencia Sr. Gobernador cu e titulo: “Garantia di derechonan fundamental y huridico di Maykol Chavez VS-22/0122.” A base di e carta aki, e redactor a haya contesta di bureau di su Excelencia Sr. Gobernador bisando cu minister di Husticia, Rocco Tjon mester a contesta e redactor di Bon Dia Aruba por escrito tocante e carta specifico aki, pero nunca e redactor a haya un contesta oficialmente di minister Tjon.

Debi na un carta numera VS-22/0122 cu e redactor a manda, su Excelencia Sr. Gobernador a pidi un “feiten verslag” na minister di Husticia, unda minister na su turno a pidi na Sr. Richard Kramers, ex-director di Guarda Nos Costa, pa traha un “feiten verslag” di e hechonan cu a sucede cu e hoben Venezolano solicitante di asilo.

Durante un investigacion mas profundo, e reportero di Bon Dia Aruba a bin encontra e “feiten verslag” (Ambtshalve di Richard Kramers) cual tabata parti di un investigacion penal contra su persona y a usa e “feiten verslag” aki como parti di su declaracion na Landsrecherche. Kramers a traha un “feiten verslag” pa su excelencia Gobernador di Aruba cu e supuesto “hechonan” cu a pasa den e caso di e hoben Chavez, cual ta contradictorio cu e documentonan oficial y cu su propio declaracion na Landsrecherche.

Punto 3.6 di e “Feiten Verslag” ambsthalve di Kramers Kramers a bisa su Excelencia Sr. Gobernador cu e hoben Chavez semper tabata “deteni legalmente (ophouding) c.q in bewaring gesteld”. Den punto 5 di e sentencia di dia 9 juni 2022 ta skirbi “beschikking tot ophouding van 25 mei 2022 in strijd met de wet is genomen” hues ta declara cu e detencion (ophouden) di e hoben Chavez ta contra ley “onrechtmatig.”

Den e proces-verbaal di hues comisario Martijn dia 10 juni 2022 di e evaluacion (toetsing) di e bevelschrift tot inbewaringstelling di e hoben Chavez ta bisa “Nu betrokkene ten tijde van zijn staandehouding nog onrechtmatig vastzat bij GNC, “Is sprake van een zodanig ernstig gebrek in die staandehouding” hues ta declara bevelschrift tot inbewaringstelling “onrechtmatig”.

Punto 3.6 di e “Feiten Verslag” ambsthalve di Kramers
 Den su “feiten verslag” ambtshalve Kramers a bisa su Excelencia Sr. Gobernador cu “Personeel van het recherchebureau kwam op 21 juni 2022, de videobeelden halen.” E declaracion aki di Kramers na su Excelencia Sr.Gobernador no ta cuadra cu e proces- verbaal oficial di Landsrecherche cu a wordo traha bao di huramentacion pa e funcionario Sr. Luigi Croes. Tampoco cu esun di IT di GNC di nomber Sr. Erwin Anthony

Gei, cu ta testigo di Landsrecherche. Y tampoco cu Kramers su propio declaracion na Landsrecherche, na unda el a bisa cu dos colega di KPA di departamento di Recherche, cu ta Sr. Maiky Solognier y un otro funcionario di KPA, a bin busca e videobeeld dos dia despues di e incidente. E incidente a tuma luga 10 di juni 2022.

Documentonan di Landsrecherche ta mustra cu Landsrecherche oficialmente a bay busca video beeld dia 3 di october 2022.

Den declaracion di Kramers na Landsrecherche, el a bisa cu Sr. Maiky Solognier y un colega di KPA a bay busca videobeeld 2 dia despues di 10 Juni 2022 y a interoga Kramers dia 5 di october 2022.

Ademas dia cu Kramers a haya yamada pa bay Landsrecherche el a bay busca videobeeld cu tabata den e sistema di KPA (Recherche Bureau), segun declaracion di Sr. Gei, interoga como testigo di landsrecherche; y IT di GNC tambe a declara na Landsrecherche cu 2 pa 3 dia despues di 10 juni 2022 dos recherche desconoci a bay GNC busca e videobeeld y bay cu nan.

“Proces-verbaal van bevindingen dat GNC geen videobeelden heeft van het gebeuren van de aangever M.H.R CHAVEZ BOHORQUEZ.”

Declaracion di e punto 3.6 di e “feiten verslag” (ambtshalve) unda cu Kramers a bisa na su Excelencia Sr. Gobernador “Personeel van het recherchebureau kwam op 21 juni 2022, de videobeelden halen” no ta cuadra cu ningun di e fechanan y proces-verbaal oficial di Landsrecherche traha bao di huramentacion pa e funcionario Sr. Luigi Croes, Kramers su propio declaracion na Landsrecherche y e testigo y IT interoga door di Landsrecherche.