Bon Dia Aruba a logra haya e documento den cual hues di Corte di Prome Instancia ta nenga Richard Kramers pa bay GNC. Den investigacion di VDA a sali na cla cu nan a reconoce un patronchi di actitud y comportacion intimidante, esey a conclui cu no ta existi garantia suficiente cu e lo cumpli fielmente cu e debernan den un funcion di confiansa.

Funcion di confiansa

Segun Veiligheidsdienst Aruba (VDA) funcion di confiansa ta un funcion na Aruba den cual e forma di cumplimento por representa un peliger of un riesgo pa existencia continuo do orden huridico democratico, integridad di administracion publico of siguridad y otro interesnan vital di Aruba manera Lbham ta indica den su articulo 2.3.

Proceso

Dia 8 di september ultimo gobierno a dicidi di suspende Richard Kramers de su funcion como director interino di Guarda Nos Costa (GNC), ademas tambe el a wordo informa cu despues di su vakantie e mester a bay traha back obligatoriamente na Cuerpo Policial di Aruba.

Kramers a presenta un obhecion pa e decision aki dia 19 di september ultimo.

Hechonan

Kramers a traha den Cuerpo di Polis te mita di aña 2020 como hefe di departamento di Cacho (K9) di Cuerpo Policial di Aruba, for di 14 di augustus di 2020 el a keda encarga como suplente di leiding di GNC.

17 di september 2020 Departamento di Recurso Humano (DRH) a registra Kramers pa un investigacion di siguridad nacional den relacion cu e funcion cu e tabata postula como Hefe di Servicio di GNC.

30 di april di 2021 den Conseho di Ministernan a aproba e nombramento di Kramers den e funcion di Hefe interino di Servicio di GNC.

Via decision di dia 13 di juli di 2022, minister presidente y minister di Asuntonan General Evelyn Wever-Croes a nenga Kramers e declaracion di No Obhecion ‘Verklaring van geen bezwaar’ (VGB) na unda cu despues Kramers a solicita un obhecion contra minister presidente.

Corte a considera cu Kramers a haci hopi merito riba e hecho cu tabata existi un interes urgente pa un solucion, entre otro, el a argumenta cu si e ta bay back na Cuerpo Policial di Aruba esey ta nifica un degradacion considerabel pa su persona of su inactividad y por lo tanto el a opina cu e mester bay back na GNC lo mas antes posibel.

Despues di e investigacion di VDA a conclui cu Kramers ta nenga su nombramento formal pa e funcion di confiansa di director di GNC, den e investigacion aki a sali na cla cu nan a reconoce un patronchi di e actitud intimidante y comportacion di Kramers pa loke nan ta conclui cu no ta existi garantia suficiente cu e lo cumpli fielmente cu e debernan deriva den e posicion di confiansa den cualkier circunstancia.

 

Hues a rechasa e peticion di Kramers di bay traha back como director interino di GNC.

Redactor di Bon Dia Aruba nunca a haya contesta di Kramers tocante cierto pregunta di diferente situacion cu a tuma luga na GNC. Por ehemplo di J. Molleda kende tabata e vocero tempo cu tabatin varios welga na GNC di e detenidonan den cual nan a subi riba dak na aña 2020. Par di dia despues a nombra Kramers director interino di GNC. Di esaki a surgi algun pregunta, entre otro:

Segun informacion e persona aki J. Molleda a drenta cu boto di manera ilegal na isla di Aruba, despues di e welga Kramers a duna e persona aki meldplicht?  Si ta si, kico ta e motibo valido di pakico e persona aki a haya meldplicht?

Kramers tabatin comunicacion cu e persona aki di un manera of otro despues di e protesta di e dia cu nan a subi riba dak?

Preguntanan cu tambe ta falta pa contesta den otro caso ta si Kramers a yega di comparti documentonan secreto cu otro miembronan di prensa siendo cu tin un investigacion penal andando? Funcionarionan di GNC E.Perez y G.Solognier a kibra ley di trafico y pasa den verboden pa detene un hende den Caya Grandi, nan a haya opdracht directamente for di Kramers?

Mirando cu na e momentonan aki Kramers ta traha oficialmente bao Cuerpo Policial di Aruba, Bon Dia Aruba lo manda tur e pregunta pa por haya un contesta transparente na alto comisario, pa motibo cu director encarga na e momentonan aki, Sra. Irma Gordon y minister di Husticia Rocco Tjon tampoco ta contesta preguntanan di redactor di BDA.