Despues di un periodo di hopi speculacion, a wordo anuncia ayera cu Richard Arends ta e minister nobo den Gabinete Mike Eman II.
Despues di a sali for di Gabinete di Gobernador, prome minister Mike Eman a anuncia na prensa local cu a entrega e resultadonan positivo di screening di ambos Arends y di e minister plenipotenciario nobo pa Den Haag, Juan David Yrausquin. Den liñanan grandi, Arends lo bay tuma over e carteranan di Economia y Comunicacion como vakminister, mientras cu Mike de Meza lo haya e cartera di Turismo y cu Eman mes ta tuma Sector Primario y Cultura, indicando cu ambos ta pas den su propio vision di sostenibilidad y comunitarismo. Remarcabel tambe ta e declaracion di Eman cu bou di e reparticion nobo, ministernan lo haya espacio pa cambia maneho cu tabata vigente bou Otmar Oduber. Ya caba prome minister mes a cambia tarifanan di AruParking, por ehempel. Si tin organisacionnan den comunidad cu lo kier reuni cu e ministernan nobo, lo bay tin espacio pa esaki.
Speculacion
Veiligheidsdienst, Ministerio Publico y Departamento di Impuesto a tene nan screening di ambos Arends y Yrausquin. E proceso aki lo a termina diabierna cu a pasa, segun prome minister Eman. E documentonan den cual tur tres instancia ta duna nan luz berde pa e dos candidatonan aki por bira minister a wordo entrega ayera mainta dor di e lider di gabinete cerca gobernador interino. E ta bisa di ta contento cu con lihe e proceso aki a bay, a pesar di e gran cantidad di speculacion cu tabatin durante ultimo simannan. Hecho ta cu diferente reporte a sali afo bisando cu Arends lo no kier a bira minister, mirando e lazonan amplio di su famia cu e minister saliente Otmar Oduber. Principalmente su tata, Simon Arends, ta conoci como man drechi di e ex minister. Aunke cu ta remarcabel si cu Arends den e constelacion nobo no ta mishi cu ningun cartera cu tabata den man di Oduber, prome minister Eman a desmenti ayera mainta cu lo tabatin dificultad pa hay’e abordo di su gabinete, bisando cu e proceso di documentacion di Veiligheidsdienst, Ministerio Publico y SIAD a tuma su tempo. Eman a bisa cu e ta haya logico cu tabatin speculacion pa loke ta e pregunta ken lo yena e puesto cu a cay habri cu salida di Otmar Oduber y con lo bay reparti e carteranan. E prome minister a conclui bisando cu pa cu tur esaki, gabinete a yega na un consensus. Sinembargo e no kier a bay den mas detaye pa cu e reparticion di e carteranan den liñanan grandi.
Huramentacion
Proceso di huramentacion di e dos ministernan nobo – di cual Yrausquin na momento aki ta na Merca aworaki – ta den man di gobernador. Prome minister Eman ta declara di no kier anticipa riba ki dia gobernador ta cla pa huramenta Arends y Yrausquin. Gobierno mes falta pa traha e Landsbesluit den cual e reparticion nobo di carteranan ta wordo formalisa. Mayan probablemente esaki lo yega Conseho di Minister. Mientras tanto e Landsbesluit den cual ta retira Otmar Oduber como minister a pasa.
Trayectorio den AVP y gobierno
Mescos cu durante encuentronan cu prensa anterior, Eman a pone enfasis riba hecho cu ta trata akinan di personanan hoben cu, en bes di bay gana nan porvenir den sector priva, lo a scoge pa traha como gobernante ganando menos placa. Ambos Arends y Yrausquin ta mas hoben cu 40 aña. Richard Arends tin su trayectorio den partido AVP y den gobierno actual como consehero principal di ambos prome minister Eman y minister De Meza. Arends tambe a fungi como negociado principal na nomber di gobierno den e traspaso di e refineria di Valero pa Aruba y cu e operador nobo di esaki, Citgo.
