For di siman pasa a cuminsa circula varios rumor cu Richard Arends lo bira e siguiente lider di e partido berde. Nos a comunica cu sr. Arends pa combersa un rato riba esaki, su sentimentonan como politico pa prome biaha, e resultadonan di eleccion y si e lo ta dispuesto pa lidera e partido Avp.

Sr. Arends a bisa cu e tambe a scucha e rumor ey pero ta indica: “Simplemente e partido ta den proceso di busca of nombra un otro lider cual ta algo cu no ta bay sosode di biaha. Mi tambe a tende pero nada den e direccion ey. Awor e proceso ta bay cuminsa y mi mes no sa con esaki ta hinca den otro. Pero no tin nada cu lo ta bay ta ami of algo asina.”

Bon Dia Aruba a puntr’e e ora si e lo ta dispuesto pa tuma e posicion aki, si e oportunidad mester presenta.  “Bo sa e ta algo cu mi no por imagina ainda. Un aña pasa mi no a pensa cu mi lo drenta politica anto na final mi a hacie. Mi no por bisa awo cu mi ta dispuesto of no pasobra e no ta husto pa mi saca un conclusion aworaki. Mi ta kere cu gewoon e partido mester sigui cu e proceso y na e momento ey nos ta wak.”
E ta bisa cu semper e partido a pone confiansa den dje pa posicionnan cu tabata nobo pe unda cu e ta haya el a haci un bon trabao.

Concentra riba crecemento di empresanan chikito
Sr. Arends a bisa nos cu tur e cosnan cu el a logra ultimo ta cosnan cu nunca e tabata tin ambicion asina pa yega na dje. Pero na momento cu a dicidi di drenta politica, a duna su ‘100% di dje’.
“Mi no tabata un politico pa un tempo largo, loke mi tabata trece na mesa ta mi experiencia y calidad di trabao cu mi a desplega.” E ta kere cu a base di esey el a logra haya asina hopi apoyo den e eleccion aki cu 1390 voto como politico pa prome biaha riba un lista (number 5).  E ta bisa cu su carera politico en absoluto no a stroba nada di locual ta su carera y bida normal. “Mi a hiba un campaña sin priminti nada, un campaña hopi transparente. ”

E kier sigui concentra riba crecemento di empresanan chikito, y percura pa sigui pusha den cual posicion cu e por ta. “Percura tambe pa accesonan di financiamento, percura pa empresanan chikito por tin acceso na financiamento. Riba e control di prijs, cual ta e comentarionan cu mas mi tabata haya durante campaña. E ta obviamente cosnan cu bo sa tambe pero no ta tur cos como gobierno bo por controla. Pues lo sigui concentra riba esey y duna e consumidor e instrumentonan necesario pa por hacie.”