Siman pasa Parlamento a aproba un mocion unanimemente rechasandopa Aruba aproba creacion di e entidad den forma di rijkswet cu lo tin podernan ehecutivo, ademas di ta un entidad pa financiamento.

Ainda tin riba mesa ainda creacion di un supervision financiero via rijkswet pa Aruba, mientras cu Aruba tin su mesun ley. Segun Parlamentario Richard Arends, Gobierno no a duna contestanan concreto pero a manda un e contra-propuesta sin informa Parlamento di su contenido.

Nos pais ta na un crusada unda Gobierno mester scoge!

No tin duda cu Gobierno y sector priva mester di sosten di likides, sobre todo aworaki den momento cu nos economia a cuminsa lora back. Gobierno mester di financiamento pa su gastonan operacional y sector priva ta conta riba e subsidio di salario y sosten pa empresanan mediano y chikito pa wanta cabes riba awa. Gobierno ta na un crusada cu tin cu bay haci escogencia riba condicionnan cu consecuencia riba termino largo pa por haya si un alivio financiero riba termino cortico.

Arends ta splica cu for di su desertacion den parlamento a purba di separa dos cos for di otro. Un banda tin e creacion di un entidad di reforma Caribense – loke e la referi na dje como e “super entidad” – y di otro banda e paketenan di reforma cu tin riba mesa awo akinan pa cada pais. Segun Arends, aunke cu e paketenan di reforma tin proposicionnan valido, e ta mira algun accento ideologico tambe. E paketenan ta toca temanan manera dolarisacion, aumento di edad di pension, introduccion di un BTW y tambe benta di accionnan den empresanan estatal. Otro propuestanan por wordo debati riba nan si nos sociedad ta desea esakinan.

E “super entidad”

E problema ta sinta na e autoridad y competencia duna na e entidad di reforma cu no solamente lo percura pa e paisnan ehecuta loke wordo cumbini den e paketenan di reforma, pero cu riba su mes – bou responsabilidad politico di gobierno Hulandes – lo por inicia y ehecuta otro proyectonan y inversionnan independientemente di Gobierno. Djins e creacion di e entidad aki via un rijkswet ta cambia e orden constitucional di Reino por completo, sin cana e caminda necesario pa cambia Statuut.

Segun nos sistema constitucional mester por papia di un cooperacion boluntario y mester por tin necesidad di un uniformidad legal pa regla cooperacion den un Rijkswet. E proposicion riba mes sinembargo kier duna autoridad di Reino na un organo Hulandes bou di ley Hulandes riba asuntonan cu ta netamente regarda pais. E Statuut no a wordo traha pa bou capa di ‘cooperacion’ pa eleva asuntonan na nivel di Reino.Ta crea un impresion cu tin cooperacion of un necesidad di cooperacion riba un scala di areanan di maneho. Richard Arends tambe a bisa cu si kier tuma over, mester hacie na e manera corecto: ta hacie via articulo 51 hunto cu articulo 43 y no di carambola asina aki manera ta proponi.