E no ta asombra nos mas ora nos ta tuma nota con Minister President mr. Evelyne Wever-Croes ta tuma pueblo haci. No solamente esnan cu no a vota p’e sino abo tambe cu cada biaha ta buta bo confianza den partidonan tradicional MEP y AVP.

Diamars dia 4 di october pasa gobierno ta declara via entre otro su pagina di Facebook cu Bureau Integriteit Aruba ta bay introduci “vertrouwenspersoon integriteit “ y “interne onderzoeker”. Den e articulo gobierno corectamente ta ilustra cu integridad ta sumamente importante pa bienestar di nos pais y comunidad. Eynan mi ta dun’e tur rason. Ta asina si cu si no ta pa Partido ReD Democratico, cu desde su prome entrada den Parlamento na 2005 no solamente ta papia di integridad sino ta mustr’e tambe den accion, awe no lo ta papiando mes di un Bureau Integriteit.

Dr. Armando “Rudy” Lampe a hasta sali ariba portada di un media cu su dicho: Integridad bo tine of bo no tine. Minister president actual a haya e slogan asina bon cu e la dicidi di us’e pa su mes. Den prome programa electoral di ReD na 2005 a propone bin cu un Bureau Integriteit, y p’esey den programa di gobernacion di 2017 a copia literalmente tur loke ReD a scirbi tocante integridad y ta p’esey a bin Bureau Integriteit.

E pregunta ta cu si tin tanto integridad na pecho dicon no a bisa nada cu ex minister O. Oduber tabata bao investigacion? Dicon ta te awo ta papia di investigacion haci ariba ex minister Marisol? Que hubo di vacuna-gate y tur e otro gatenan cu tin demasiado pa menciona? Mi a yega di declara den Parlamento cu prome cu mi a drenta den Parlamento mi tabata conoce e wega di polis cu ladron pero cu eyden mi a ripara cu nan ta hunga ladron cu ladron. Nan ta horta y masacra e pueblo y e pueblo ta bolbe buta nan na poder, increible, tristo y berdad.

MP tin palabra masha bunita y asina ta convence un cantidad di hende cu ta scoge pa no wak e gañamento sin fin y falta di vision pa hiba e pais aki dilanti. Ora cu ReD a propone legalisacion di cannabis como pilar economico nobo y a mustra cu cifras un total di afl. 500.000.000,00 y cu esaki ta realistico, MP a haya masha oportuno pa laga haci declaracionnan den Parlamento bao di encargo di minister di Economia mr. Xiomara Maduro gañando tur hende cu legalisacion di cannabis medicinal lo bira Aruba su di dos pilar economico nobo. Esaki e la haci den tratamento di presupuesto na december 2018 den Parlamento di Aruba.

Asina aki tambe a tene ReD na liña pa cu legalisacion despues cu señora D. Lejuez a bandona fraccion di MEP. Esaki tabata e momento cu de facto ReD a haya un yabi di gobernacion y no prome (manera hopi hende ta pretende). ReD a purba den e corto periodo cu a wordo acompaña pa un pandemia pa mira si e por logra haya su partnernan den coalicion MEP cu POR pa cumpli cu e acuerdo di gobernacion firma entre e tres lider.

Strategicamente a tene ReD na liña pero na final e berdad a sali na cla. Awe ni papia ta papia di cannabis pero ta scoge pa bai saca e mesun afl. 500.000.000,00 na b.b.o. for di saco di pueblo perhudicando tur hende incluyendo comerciantenan y nos economia en general. Esaki ta e pilar economico di MEP/RAIZ. MEP mester a caba cu ReD cueste lo que cueste y a keda sin legalisa masacrando e pueblo por completo pasobra awo ta cu b.b.o. nan ta bay saca e mesun afl. 500.000.000,00 for di bo saco pa yuda nan maneho deficiente y sin vision.

MP a prefera di sacrifica e pueblo di Aruba djis p acaba cu un partido di 1 asiento, dicon? Awe tur prueba ta tur caminda pa esnan cu kier realisa cu ta esaki a tuma lugar. Poco ta esnan cu e grandesa te awo pa a acerca nos y admiti cu nan a cay den trampa di kere cu ta ReD a faya.

Pa un pais tin oportunidad di sobresali y para stabiel financieramente y den su compromisonan internacional e ta indispensable pa su pueblo ta critico, educa y husto. Cada 4 aña pueblo ta haya e oportunidad pa dicidi e rumbo di su pais. Cuater aña riba su mes no ta hopi pero si e ta suficiente pa haci bon of comete un daño cu por tuma generacionnan pa recupera di dje.

Bo voto ta un arma poderoso, us’e bon, us’e sabi y consciente.