“Nos tin un gobierno, un acuerdo y 11 parlamentario cu ta sostene e gobierno. Esaki ta keda asina te ora cu un di e partidonan ta haya motibo valido pa kita confianza,” ta locual lider di Red Ricardo Croes a bisa ayera durante su programa di Facebook.

Sinembargo, e lider di e partido di coalicion tin hopi critica pa e forma con e comision di mediacion, dirigi pa Mr. Arie Swaen a laga e posicion di RED for di e documentonan cu ta relata e disputa cu Minister Marisol Lopez Tromp. Un disputa cu tabata uno interno di POR pero cu a bira uno di partido MEP tambe. “Partido RED y Minister Lampe nunca tabatin problema cu Minister Lopez Tromp.”

E punto di RED sinembargo ta, cu a scoge pa forma un coalicion y ta a base di e acuerdo aki, ta sostene Gobierno pa yuda saca Aruba di e debacle cu AVP a laga Aruba aden, Ricardo Croes a bisa. Esey di otro banda no ta nifica cu ta accepta cu ta mal uza un palabracion den acuerdo di Gobernacion, esta cu tin mediacion ora di impasse, pa forsa un Minister baha sin mas.

Y tabata e desacuerdo aki cu a pone entre otro cu miembronan di fraccion di POR a pidi nan mes, pa suspende un reunion pa entrega mocion di desconfianza contra nan mesun Minister.

Croes a splica cu prome cu Juni, fraccion di RED nunca a tuma nota di problemanan cu por tabatin cu Minister Lopez Tromp. Al contrario. Te hasta a mira un video di Parlamentario Alan Howell elogiando su colega di partido y ex lider di fraccion di a yud’e den su trabou como Parlamentario, catalogando Lopez Tromp como su mentor. “Es mas, ami no tabata sa cu partido POR tabatin problema interno.” Croes a splica cu su enfoke tabata riba e plan macabro cu tabatin pa kita Rudy Lampe como Minister, “pa haya sa cu banda di AVP, tabatin mas partido cu tabata den e intento ey. Pero ami mes no tin ningun problema cu ningun hende. RED ta traha cu interes general na pecho. Si tin un persona cu tabata trata di crea union ta mi persona, y si tabatin un persona cu tabata haya golpi ta mi persona.”

Bruha

Lider di RED a bisa cu el a scucha tur e conferencianan di prensa ayera riba e tema, y e ta kere cu mescos cu resto di comunidad, el a keda tur bruha kico lo ta e motibo di e problemanan. Ni na Juni, ora cu pa prome biaha a haya sa cu tin problema interno den POR, e tabata compronde e raiz di e conflicto.

Tanto Croes como Lampe como tal a considera e proposicion di Prome Minister Wever Croes pa intermedia como un bon idea y asina wak con pa resolve e problema interno di POR. “Ningun momento tabatin indicacion di conflicto, ni durante reunionnan di comisionnan fiho.”

Pero e problemanan a escala te na nivel di MEP dia 24 di Juli. Ricardo Croes a considera cu e tabata manera un lamper a dal MEP. “El a bin espontaneo y a tene un reunion di coalicion di caracter di urgencia. Y berdad ta cu no a invita Marisol Lopez Tromp.”

Croes a splica cu e tabata presente como lider di partido di coalicion RED na e reunion pa discuti e impasse, y Minister Lampe tabata na un reunion di Conseho di Minister pa delibera e mesun problema.

Tanto Minister Lampe como lider di partido RED Ricardo Croes ta sostene e idea di un solo Gobierno unda mayoria ta determina. Den Conseho di Minister, banda di Minister Andin Bikker, tres otro Minister (di MEP) a bisa di no tin confianza mas den Minister Lopez Tromp. Y si cuater di ocho Minister no atende reunion, Conseho di Minister no tin quorum y no por tuma decision pa Pais Aruba. Como tal, Croes a sugeri pa uza e stipulacion di e acuerdo di Gobernacion, pa busca mediacion.

Asina a yega na un acuerdo cu Prome Minister Evelyn Wever Croes ta haya encargo temporal di e cargonan di Minister Lopez Tromp. Pero e temporal lo mester tabata hopi cortico, pasobra Constitucion di Aruba no ta permiti un Minister sin cartera. Gobernador lo no firma un decision asina. Y Andin Bikker corectamente a argumenta e punto aki durante e periodo di Paul Croes, kende tabata bou investigacion y AVP kier a lag’e como un Minister sin cartera.

RED laga afo

E Comision di mediacion, cu ta encabesa pa Mr. Arie Swaen, formado, y representantenan apunta pa e partidonan a reuni cu Minister Lopez Tromp riba Diasabra, 25 di Juli, algo cu a sorprende RED. Pasobra e mediacion tabata entre e partidonan. A haya sa di e reunion aki basa riba e declaracionnan di e Minister despues di e reunion, kende ademas a declara cu e lo biaha pa su mañan pa hiba su yiu Hulanda.

Asina a sigui otro reunion cu e comision di mediacion, pero e biaha aki cu lidernan di partidonan di coalicion for di cua a sali e peticion firma pa Ricardo Croes pa yama un reunion publico cu karakter di urgencia cu e Minister. Di e forma aki lo a duna e Minister e oportunidad pa duna su banda di argumento. Sinembargo tabata lider di fraccion di POR dr. Dellanire Tromp cu a bay na cas di Sr. Croes kende tabata sufri di kebrante di salud, pa firma pa yama e reunion mesora. “Ma bis’e cu e mes tabata wak con mi tabata, y ta dificil mi por atende e reunion mesora.”

Pues e reunion no a tuma luga y dia 28 di Juli, lidernan di e partidonan di coalicion a bolbe bini hunto y aki a haya e notulanan di e diferente reunionnan. Y den ningun di e documentonan ta refleha e pensamento di RED, esta cu e partido y su Minister no tin problema cu Minister Lopez Tromp. Al contrario, e representante di RED den e comision di mediacion, sr. Leo Croes ademas a fungi como notulista y a remarca cu locual el a skirbi di e reaccionnan di Rudy Lampe y Ricardo Croes no tabata refleha den e documentonan produci. Croes a enfatisa cu e no por publica e documentonan aki, mirando cu ainda nan no a keda presenta oficialmente na Parlamento, pues no ta publico ainda.

No tin problema cu Marisol Lopez Tromp

“Minister Lampe y mi persona a bisa di no tin problema cu Marisol Lopez Tromp. Pero nos ta compronde e homogenidad di Gobierno (mayoria ta dicidi) y cu e Minister kier bay Parlamento.”

Minister Rudy Lampe tambe a confirma e posicion aki. Esta cu a firma e decision di Ministerraad pa kita e cartera cu un caracter temporal cortico y no tin nada di haber cu falta di confianza. Pero pa un of otro motibo, e ponencia di RED no a keda refleha den e documentonan di e reunionnan. Asina a bin un punto di bista di minoria cu a keda entrega y agrega na e documentonan. Sr. Leo Croes a skirbi e posicion di RED cu ta refleha e importancia pa Gobierno sigui funciona, cu e kitamento di cartera ta di un caracter temporal cortico, cu Minister Lopez Tromp mester haya oportunidad pa argumenta su posicion den Parlamento y cu RED ningun momento a perde confianza den su persona como Minister.

Reunion 31 di juli

Pa lider di RED y miembro di coalicion cu ta sostene Gobierno, e tabata incomprendibel con e parlamentarionan di POR no a haci nan tarea y investiga tur detaye prome cu a acudi na e reunion pa kita confianza den nan Minister. Es mas, Ricardo Croes ta cuestiona e forma con e reunion a bay. “Normalmente ta e Minister lo a hiba su discurso, pa despues Parlamentarionan haci pregunta. Pero Presidente Thijsen a dicidi pa laga e reunion bay diferente.”

Croes a bisa cu e tabata kier sa di e Minister kico a pasa, prome cu a haci pregunta, mirando cu pa tres luna, tur cos tabata mustra bon, te ora cu a haci un entrada hudicial na cas di e ex lider di POR. Aunke cu e ta sali di punto di bista cu un hende ta inocente te ora cu den Corte prueba lo contrario, el a conclui si cu e relacion cu e Minister nobo a daña despues di e rumornan di corupcion cu a cuminsa core den comunidad.

“Parlamentario Shailiny Lee tabatin rason ora el a bisa cu e reunion tabata riba desconfianza, y no corupcion. Pero e desconfianza ta basa riba rumor di corupcion,” Croes a bisa. Pa tal motibo tambe su pregunta lo tabata si Minister Lopez Tromp a haci denuncia na autoridadnan, manera colega di partido Rudy Lampe a haci ora cu el a topa cu casonan straño. “Y durante e reunion, Minister Lopez Tromp a laga sa claramente. cu el a haci denuncia. Y el a bisa cu el a papia cu Minister President.” Y aunke Minister President no ta Ministerio Publico, el a yega di carga e responsabilidad di Serlimar tempo cu tabata warda pa Marisol Lopez Tromp huramenta. Y durante e periodo aki, durante un reunion publico, AVP a entrega un mocion pa investiga Serlimar. “Ami a vota contra, pasobra Minister Presidente a sigura cu e mes lo laga investiga. Y a ripara cu Minister Lopez Tromp mes a haci su investigacion. Y locual nos a tende ta fastioso. E Minister a trece documentonan cu ta mustra ‘vervelend.’”

Problema di partido versus interes general

Croes a bisa cu e no por husga e documentonan presenta, pero nan tabata suficiente fuerte pa e dos Parlamentarionan di POR pidi pa suspende e reunion.”Nan tabata parce hende cu tabata lesa un opstel. Nan mester a haci nan ‘huiswerk’ miho.” Ricardo Croes a mustra riba posicionnan straño cu a tuma, entre otro Parlamentario Edgard Vrolijk kende a bisa cu e unico persona cu e ta confia ta Prome Minister Evelyn Wever Croes y un Minister Andin Bikker cu a actua diasabra comosifuera Alan Howell no a menasa cu si Marisol Lopez Tromp no retira, POR lo sali di coalicion.

Den otro palabra, tin hopi problema interno den e partidonan POR y MEP, pero asina mes, te cu e ta posibel, RED lo sigui sostene e coalicion den e tempo dificil aki, tanten cu por yega na un claridad. Pasobra RED a duna palabra na comunidad di Aruba, cu ta traha na su bienestar. Y esey ta e enfoke di RED, pa awor.