Ricardo Croes, parlamentario y lider di partido ReD Democratico riba dia 20 di april (4/20) ta refleha riba e pandemia mundial cu ta afectando mundo henter y Aruba. E parlamentario, maske a tuma varios medida pa pusha gobierno y/of parlamento pa ehecuta e puntonan acorda den acuerdo di gobernacion referente pilar economico den forma di agricultura, pero tambe cultivo di cannabis y hemp, no a haya e sosten necesario y awo gobierno ta pura pa haci algo ora ya crisis lo bay dal. “No ta laat, pero no mester tabata asina tampoco”.

Croes ta refleha den un entrevista riba Power FM riba e echo cu te dia di awe, prome cu minister di infrastructura a anuncia cu lo bin cu tereno di huur pa cultivo, ‘ningun bonchi a wordo planta, ningun cultivador a haya nada’. Croes ta haya cu Aruba tabata den su ‘comfort zone’ mirando cu tabatin su pilar economico den forma di turismo, y awo ta presenta un situacion unda entre otro e problema di alimenta e poblacion si e pilar aki ta bira serio. Maske gobierno tabatin tur e instrumentonan na su disponibilidad pa haci posibel cu awe ‘por lo menos nos lo tin hende cu por bay traha den e industria aki, despues di a perde nan trabou, pero aworaki no tin nada’.

Sinembargo Croes no ta pesimista, den sentido cu e ta kere cu gobierno no lo bin cu e cambionan necesario pa implementa un pilar economico nobo den forma di cultivo di fruta y berdura, cannabis y hemp, tanto pa consumo local, cual aworaki ta e prioridad, pero tambe pa un dia por exporta. Esaki Croes a bisa durante un sesion Live riba Facebook di partido ReD Democratico, unda Croes a indica cu si ta mirando cu tin stapnan ta wordo tuma, manera e echo cu e por a combersa cu minister di labor Glenbert Croes riba e echo cu lo bin cu un desk special pa personanan cu por bay haya trabou den e industria aki. Croes ta mira cu e proceso aki a tarda pasobra e gobernantenan en si no ta domina e materia di cannabis, pues a tarda un poco pa convence nan cu esaki ta algo cu ta pasando rond mundo y cu rason. “Nan no tabata domina e materia en lo absoluto, y pa es motibo ey mi no ta bay er op in tampoco e cos ki a tarda y awo no tin nada tampoco.” Tabatin varios momento di tension, unda tabatin gruponan speculando cu pa via cu MEP ni POR a sostene mocionnan di RED pa decriminalisa cannabis y pa agricultor local participa na industria, lo a cambia constelacion di e coalicion.

Croes no ta haya esaki ta corecto, mirando cu un coalicion, ‘mescos tur relacion, ta bin

cu desacuerdo. Pasobra nos no ta di acuerdo no kiermen cu nos ta divorcia’.

Riba critica cu Croes por a haci mas, Croes ta responde bisando cu e fraccion di ReD tin

solamente un asiento. Esey ta haci nan capacidad pa hiba temanan dilanti limita. Sinembargo, a percura cu cierto puntonan ta den acuerdo di gobernacion y a percura pa reuni cu ministernan, otro fraccionan, etc, pa por yega na nan metanan.

Den e sesion Live, Croes a contesta Bon Dia su pregunta, referiendo na kico ta e obstaculonan

percibi pa asina por yega na un pilar economico nobo cu ta inclui cannabis y hemp. Croes a bisa cu tin falta di informacion y pensamento critico riba e idea mes di legalisa cannabis of hemp y crea un industra di esaki. “Si nos cuminsa cu e palabra droga, e tin un stigma cune den Papiamento”. Croes ta indica cu ainda tin gruponan den comunidad, manera sindicato di polis, manera sindicato di maestronan, cu tin un bista negativo riba cannabis. “Tin un falta di interes pa educa nos mes”. Riba esaki ta referi na literatura cientifico extenso riba e topico, “cual cada biaha cu wordo treci dilanti ta pensa cu e ta un conspiracy, pasobra e ta manera papiando un otro idioma.”

Croes ta bou impresion cu e legalisacion pa yega na un pilar economico nobo “ta hopi mas leu cu aña pasa, ora a bisa cu ya un ley lo yega, cual no a pasa. Si esey no ta e caso, nos lo bay ripara.”