Ricardo Croes miembro di partido RED Democratico: “Mi ta pidi na instancianan y Gobierno di Aruba pa duna atencion na salud mental”

Par di dia pasa, e ex-parlamentario miembro di partido RED Democratico, Ricardo Croes, a haci un conferencia di prensa pa trece dilanti un situacion familiar cu no ta mucho facil pa compartie cu comunidad, den caso aki ta trata di su ruman cu segun Croes mes ta trata di un situacion grave.

“Ta hopi importante pa mi, pa mi puntra pa un disculpa den nomber di famia pa declaracionnan cu mi ruman homber Isidro Croes a haci, contrario na diferente comerciante di nos pais, contrario na e comunidad hudiu di nos famia y contrario na famia Croes, di parti di mi tata y tur mi primo, primanan, omonan y tantanan,” Croes a cuminsa bisa den su declaracion.

Isidro Croes a haci un denuncia publico na un medio local sigurando cu su ruman Ricardo Croes ta tilde di “loco y cu e ta un persona cu problemanan mental,” den esaki, el haci un pedido na autoridadnan di Aruba y huesnan di Corte di Husticia cu e ta teme pa su bida, e caso aki ta trata di herencia familiar segun loke e mes a bisa na e medio.

Pa Ricardo Croes, e caso aki ta trata di un “explotacion di un persona cu tin necesidad di ayudo medico profesional pa su salud mental, tur hende cu tiki sentido por a realisa cu mi ruman homber tin mester di ayudo y mi ta kere, esaki ta e motibo di pakico el a acudi na 24ora mirando cu ta e parti di e declaracion aki ta berdad? e parti cu el a bay OM, e parti cu el a bay Corte, por ta e parti cu el a bay Notario, pakico mi ta bisa porta? Pasobra el a declara diferente cos.”

Segun Croes, e intencion di 24ora pa desacredita su persona “no ta algo desconoci” for di aña 2017 ora el a bira parti di e coalicion di e prome Gabinete Wever-Croes conhuntamente cu Armando “Rudy” Lampe, ex-minister di Enseñansa, Ciencia y Desaroyo Sostenibel.

El a continua indicando cu a keda demostra cu partido RED Democratico ta integro y cu “de facto partido RED Democratico ta consisti di candidatonan integro, RED tabata den gobierno pa 4 aña y RED tabata den parlamento 8 aña y no tin ni un investigacion riba partido RED Democratico den ni un sentido.

Integridad ta algo hopi importante, ta algo cu ni un di e dos gobiernonan mas grandi di Aruba y algun partidonan chikito por papia di dje, pasobra cu tin investigacion ariba diferente partido, politico di diferente partido, tin hendenan cera.”

Den su opinion, e declaracion di su ruman den e medio aki ta algo “masha tristo mes y masha baho mes pa un medio di comunicacion, cu ta e di cinco poder den nos pais, e poder cu nan tin pa informa, educa nos pais no por ser mal usa pa atacha y desacredita hende, cu ademas a ser invita pa e conferencia di prensa aki y nan no a presenta pa trece e otro banda di medaya.”

Den su e declaracionnan di Isidro Croes el a papia di un machtegin cu el a duna na Ricardo e cual a haci un mal uso di esey “laga mi bisa cu e machtegin aki ta pa representa famia den un caso den Corte y mas nada, bo no por haci mas nada cune y el a declara cu mi a pone e cas di mi mama riba mi nomber, pa tur hende sa e unico hende cu por coy su cas y pase na nomber di otro hende ta e doño di e cas.”

El a conta cu su mama ta un pashent di Alzheimer cu tin mas cu un aña cu ta bibando den su cas y ta e ta atende su asuntonan responsablemente, “mi no kier sinta akinan papia malo di mi ruman homber y mi ta spera cu e rueda di prensa aki logra cu mi ruman homber por haya un ayudo pasobra, e tin mester di dje y nos ta desea pa e hayele.”

Ademas, el a conta cu na december ultimo el a bay hiba comestibelnan pa su ruman unda el a haya problema cu e, dal na su nanishi y lage cu boca kibra, el a haci denuncia y su ruman a bay cera pa un anochi “y 24ora a usa e biaha ey, e caso ey pa atrobe atacha mi, mi a kies pa no bin dilanti na e momento ey pa cos di famia. Pero mirando cu mi ruman homber indirectamente ta manda un tipo di menasa cu e no tin miedo di ni un hende y Polis ta na altura.”

Den su opinion, e ta bisa cu of su ruman homber ta haya ayudo profesional cu lo atende cune y cu lo por realisa cu tin ayudo pe of e ta para responsabel pa lo cual e ta haci “mi ta pidi na Gobierno di Aruba, esnan involucra pa tur cu di un forma of otro duna atencion na tur persona na Aruba cu tin mester di ayudo pa nan salud mental.

Salud mental ta un situacion serio cu nos tin y no ta ami ta trece esaki dilanti, e ta den noticia a cada rato. Cuido di hende grandi tambe y den nos hogar practicamente nos ta campando cu tur dos,” el a sigura.

Pa motibo cu su famia ta pasando den un situacion basta delicado el a pidi ayudo di instancianan concerni, gobierno of Departamento Social pa nan por logra haya un ayudo pa su ruman homber y garantisa cu e problema aki no lo scala y bira otro cos cu nos no lo desea.”

Pa tur e motibonan aki, el a bisa cu no tabata facil pa trece e informacion aki y trece un balans, tambe el a duna un mensahe na e medio en cuestion pa “si bo kier sigui ataca mi como politico dal bay, pero por fabor tene bo mes na un nivel di periodismo. Si Ricardo no ta sirbi pa bo como politico, ni como hurista, awor bo ta atacha mi den mi credibilidad general pasobra bo a declara cu ora bo caba cu mi politicamente mi ta resta 1.000 voto sin haci bo nada.” El a finalisa.