Den un combersacion cu Sr. Ricardo Croes, a sinta cu Bon Dia pa dialoga riba e asunto tan papia actualmente den comunidad cual ta e amienda di codigo civil pa matrimonio mesun sexo y den general dicon ta parce tin tanto ”homofobia” riba e isla.
”Mi no ta compronde e “homofobia” di hopi creyente. Alcohol ta un “killer” di sociedad, e ta legal y ta wordo consumi pa e mayoria cu ta biba ariba Aruba,y e mayoria ta Cristian.” Sr. Croes ta comenta. E Cristian cu ta bou di e impresion cu e ta malo ta educa su hogar pa no uza esaki. Bijbel ta bisa cu nos no mester bebe bira burachi. Na Merca arma ta legal, no ta p’esey bo mester cumpra esey y uza esaki tampoco segun Sr. Croes. E Cristian ta educa su hogar pa no mata, no cumpra e arma y no uze?! Prostitucion ta legal. E Cristian no ta bishita prostituta, e ta educa su hogar pa no haci e. Tin un gran cantidad di fastfood cu ta haci un gran cantidad di hende malo. Tur ta legal. Mescos cu e alcohol, e fastfood ta wordo consumi pa e mayoria cu ta biba ariba Aruba. E Cristian ta educa su hogar pa come saludabel, tin ora manera bijbel ta bisa. ”Tin tur sorto di fiesta inmoral, legal. E Cristian ta educa su hogar pa no participa y asina biba manera un bon Cristian. Tin un gran cantidad di remedi legal cu ta super malo pa e ser humano, por ehempel kimoterapia. Cuanto Cristian en bes di uza yerba manera bijbel ta manda ta core bay tuma kimoterapia y radiacion. E Cristian di berdad ta educa su hogar pa e no tuma e venenonan aki?!”, Sr. Croes ta splica.
Pakico tanto hipocresia?
Ariba internet bo por haya tur sorto di pornografia pa wak. Bijbel ta prohibi e, pero e ta legal. E Cristian ta educa su famia pa no participa den e actonan aki y pa no wak porno. Si homosexualnan haya nan derecho den Parlamento esey no ta encera cu tur hende lo tin e tendencia di bira homo Sr. Croes ta bisa Bon Dia.” Ta kico ta e miedo di e Cristiannan? Ami no tin duda en lo absoluto cu si bo ta sigur den bo Fe anto bo no tin miedo di niun ley cu ta haya di e leynan di Dios pasobra abo ta cana den bo Fe y no tin miedo di e candelanan cu tin rond di bo. Cu bo Fe y educacion Cristian bo ta cana den candela sin kima, cana den tentacion sin cay pasobra Dios ta husto cu bo den bo Fe. Bijbel ta siña nos cu husgamento ta den man di Dios. Stop di husga, si bo ta husga cuminsa cu bo mes. Hesus a bisa nos stima bo enemigo, e no a manda nos participa cu nos enemigo pero tolera, acepta y biba segun nos Fe.” , Sr. Croes ta bisa.
Educacion/amor/berdad ta e unico yabinan pa cana den bo Fe sin miedo di locual ta pasando rond di bo, segun Sr. Croes ta agrega. Miedo no ta parti di Dios, solamente Amor y den Amor no tin miedo ni tampoco tin insiguridad of duda. ”Mi no ta Dios, mi no ta liber di pica. tampoco mi ta husgando niun hende pero mi ta purba compronde pa kico tanto miedo y fobia asina aki. Mi ta un pecador cu ta biba tur dia ta haci mi best pa no faya den bista di Dios y di hende. Ora mi realisa cu mi a faya mi ta pidi pordon mescos cu ami ta pordona y mi ta permiti tur otro locual ami mes ta anhela esta di wordo acepta, stima, pordona, tolera, compronde y no pusha un banda manera un cos cu ami no ta conta den e comunidad aki.”
