Den un combersacion recien cu lider di partido RED Democratico, Ricardo Croes, a toca e tema di enseñansa como tambe kico ta algun plan cu partido RED Democratico tin pa e siguiente periodo di gobernacion si nan haya e oportunidad un biaha mas pa drenta Parlamento y Gobierno di Aruba.

Manera ta conoci den Gabinete Wever-Croes I partido RED tabata encarga cu cartera di enseñansa y Sr. Rudy Lampe tabata e minister cu tabata carga e cartera aki. Durante su periodo como minister di Enseñansa Sr. Lampe na mas di un ocasion trahadornan di e veld di enseñansa a organisa manifestacionnan pa demostra nan malcontento y desacuerdo cu e minister su maneho.

Croes a remarca cu despues cu gobierno a cay y cu a forma e gabinete nobo, ex minister endy Croes a tuma e cartera di enseñansa over y cu a pesar di tur e malcontento di e veld, locual cu Sr. Lampe a laga atras pa ser ehecuta, ta loke ex minister Croes a ehecuta.

El a referi na entre otro e aumento di normbedrag. El a resalta cu e aumento di normbedrag ta algo cu ex minister Lampe y partido RED a laga cla pa e subi gradualmente a base di tratadonan firma.

El a agrega cu durante su periodo den gobernacion Sr. Lampe a crea diferente scol nobo sin bay back parlamento pa pidi mas fondo y a enfatisa cu durante Gabinete Wever-Croes I no tabatin niun presupuesto supletorio den Gabinete Wever-Croes I.

El a splica cu Sr. Lampe e crea EduCampus, Aruba Adventists Academy, a haci De Schakel scol publico y Mavo, HAVO y VWO, el a bin cu Montesurri pa voortegezetonderwijs y a haci Mon Plaisir bira Mavo, HAVO y VWO.

Otro punto cu Sr. Lampe a presenta pero cu a haya critica tabata e intento pa uni Abraham de Veer School y John Wesley College pa evita cu e scol ta cera, pero e idea aki a causa un cantidad di manifestacion, pero despues e scol a cera toch. Y ora cu e sol a cera ta mira e mesun personanan cu a orchestra e manifestacion a bisa cu mester traha pa habri e scol back.

Croes a resalta cu ora Lampe a constata cu e scol ta bay cera, a bisa si no tuma e pasonan necesario e lo a cera. E a splica cu pa un scol por ricibi subsidio di gobierno e tin cu satisface algun exigencia y si e scol no cumpli cu e exigencianan aki ta contra ley pa gobierno duna e scol placa. Pa evita esey, Lampe a indica e tempo ey cu si uni e dos scolnan e ora si ta nan ta cumpli cu e exigencianan pa subsidio di gobierno y ta haya e suma cu e scol mester pa funciona y nan lo comparti cierto cosnan.

El a destaca cu pa partido RED Democratico educacion mester ta liber y no cu mayornan mester paga schoolgeld exorbitante cu salarionan cu no ta yega, un aspecto cu e partido tambe ta sostene.

Otro punto cu Croes a trece dilanti ta e topico di BTW, cual mayoria partido tin inclui den nan plan di partido pa e eleccion aki. El a remarca cu partido RED ta un di e prome partidonan cu a sostene introduccion di un BTW.

El a subraya cu prome minister demisionario a duna dos diferente respuesta tocante kico ta e motibo cu no a introduci BTW ainda. Segun Croes, e mandatario a contesta den debate cu nan a purba pasele den parlamento pero RAIZ a nenga y na un otro ocasion a bisa cu e comerciantenan no lo elimina BBO y lo simplemente agrega BTW riba esaki.

“BTW no ta un realidad ainda y e no ta bay bira un realidad, si MEP coy mando, ta un hecho. E ta bisa cu e sistema ta keda asina aworaki, e sistema semper ta manera cu e ta pasobra asina na a lag’e, e sistema te’y pa nos cambi’e. P’esey nos ta bira parlamentario, p’esey nos ta traha ley, p’esey nos ta consulta nos expertonan. Si bo bay tras di e palabra di prome minister nos nunca no por cambia nada den e pais aki. Si bo bay tras di e palabra di prome minister hamas lo bay haci un cambio. E ora bo tin cu puntra bo mes ta dicon nan no kier haci cambio. Ta manera cu nan kier pa e Arubiano keda eynan pega,” Croes a enfatisa.

El a destaca cu den ultimo tempo e Arubiano no ta pega na un caminda mas ta djis bayendo mas atras. “Nos yiunan no ta bay bira doño di nan mesun cas, doño di nan mesun tereno, si nos no haci algo, stranheronan ta bin cumpra tur nos patrimonio y yiunan ta djis bay scol siña e cosnan basico pa bay traha pa hende,” el a agrega.

El a señala cu e mandatarionan den gobierno a mustra un deficiencia den responsabilidad di finanzas publico pa cumplimento di acuerdonan cu nan mes ta firma. El a destaca cu esey ta demostra un falta di integridad, etica y profesionalismo, y e ta daña imagen di e pais y di gobierno,no solamente den Reino pero rond mundo tambe.

Bon Dia Aruba a puntra e lider di RED for di su punto di bista kico e ta kere ta e motibo cu partido RED Democratico a bay atras den e ultimo eleccion. “Ora bo desacredita un partido door di keda sin cumpli cu locual bo sa cu ta conta mas, pasobra tur hende tabata wak MEP y POR, pero tur hende tabata wak Ricardo pa legalisacion, y a orchestra un cantidad di manifestacion contra e unico ministerio cu nos tabatin, contra Rudy Lampe,” el a splica.

Pa loke ta trata e plannan di partido RED Democratico, Croes a indica cu e partido keto bay ta kere den cannabis como pilar economico, pero no ta e unico cos cu nan ta enfoca riba dje como pilar economico, nan tin bista riba energia alternativo y sector primario tambe.

Pa loke ta energia alternativo el a splica cu nan tin un plan pa traha un caminda di bicicleta cu lo pasa full rond di e isla y loke ta interesante di e caminda aki ta cu e tin un dak cu solar panels y turbina di biento.

El a sigui splica cu a haci investigacion y e proyecto por costa alrededor di 80 pa 100 miyon florin. El a remarca cu e cantidad di coriente cu e lo produci ta un cantidad grandi cu por suministra coriente na scolnan publico, edificionan publico y talbes hasta casnan di cuido di adultonan mayor.

Croes a agrega cu segun informacion cu e conoce tin scol cu ta paga te 800 mil florin na coriente, locual ta un suma halto. Ademas tin alrededor di 80 scol na Aruba y si sali for di e punto di bista cu tur scol ta paga esaki, ta papia di mas cu 60 miyon cu gobierno ta paga di coriente sin conta edificionan publico.

Di mesun manera el a enfatisa cu otro punto cu partido RED lo enfoca riba dje si haya oportunidad pa sinta den gobierno atrobe, lo pordona e debe cu studiantenan tin na Hulanda, sobre todo studiantenan cu a studia profesionnan cu na Aruba tin escasez di dje. El a indica cu nan ta haci un acuerdo cu e profesionalnan aki pa cinco aña tanto pa sector priva como sector publico pa trece nan for di Hulanda.

El a remarca cu Aruba mester di mas hende cu diploma di HBO of un diploma cientifico pa por aumenta e nivel di conocemento den e pais cu ta refleha tambe den e nivel politico y di ehecucion di diferente proyecto.