Lider di Partido Red Democratico, parlamentario Ricardo Croes, den un comentario na urna di votacion ayera a comenta pa Bon Dia Aruba cu geschillenregeling ta lo mas importante pa un coalicion por funciona.
Bon Dia Aruba a puntra Croes si e lo bolbe sostene un gobierno di coalicion, of e ta premira di bay den oposicion. “Nos ta mira prome kico e resultado di awe ta bay ta”, el a contesta. “A base di e resultado ey nos lo dicidi kico ta e siguiente pasonan.”
“Na e momento aki nos ta desea pa pueblo realisa cu partidonan tradicional no por keda haya e mesun sorto di poder pa e mesun sorto di politica, e mesun sorto di oportunismo, e mesun sorto di problematicanan y campañanan sigui tuma luga.”
“E pueblo aki ta dicidi kico e gobierno di e pais aki ta bira. Y whatever cu e pueblo aki dicidi e ta bon bini pa partido Red Democratico.”
BDA: “Cua ta e punto den e acuerdo cu Hulanda cu Croes ta considera importante pa un eventual coalicion por funciona?”
Croes: “Na e momento aki no tin nada, nada, absolutamente nada mas importante cu e geschillenregeling. E geschillenregeling ta e instancia cu mester bin pa percura pa democracia de facto ta locual ta tuma luga den Reino Hulandes.”
Croes ademas a comenta cu ta inaceptabel cu den un disputa, Madre Patria ta tanto un partido den disputa como hues cu ta tuma decision, algo cu ta contra e separacion di poder.
