Manera nos a publica siman pasa, diabierna cu a pasa artista local y lider di partido Red Democratico a organisa un hazaña pa recauda fondo pa dos instancia. Ricardo a cumpli cu su reto di subi 21 biaha y recauda mas cu 3 mil florin pa Pasadia Briyo di Solo.
Durante fin di siman cu a pasa, Ricardo Croes a cumpli cu su reto di subi Hooiberg 21 biaha pa recauda fondo pa Casa Cuna y Pasadia Briyo di Solo. El a cuminsa 4or di atardi anto a keda cla un tiki despues di 10’or di anochi. Despues di a logra su meta,sr. Croes a entrega e caha di donacion pa Pasadia Briyo di Solo na e directora di Stichting voor Verstandelijk Gehandicapten (SVGA). E total cu a wordo recauda completo (pues pa Pasadia Briyo di Solo y Casa Cuna) lo wordo anuncia pronto. Na Casa Cuna awe cu mañan ainda tin donacion ta drentando segun sr. Croes a informa Bon Dia. E tabata un anochi exitoso, cu mas o menos un 500 persona cu a presenta, pues lo ta great pa duna tur hende un danki apropiadamente, sr. Croes ta bisa Bon Dia referiendo na un rueda di prensa special cu lo organisa pa esaki mas den siman.
Ayera sr. Croes mes a habri e caha cu donacion pa Pasadia Briyo di Solo den compania di Jeta Figaroa, cabesante di Briyo di Solo, Dennis Conradus, administrador di SVGA y e directora di SVGA, Els van Homelen. Hunto a conta e placa cu tabata den e caha.
Pa medio di un comunicado, SVGA a laga sa cu nan ta hopi contento di por anuncia cu sr. Croes a recauda e suma di 3433,20 florin total. SVGA en general y Pasadia Briyo di Solo en particular ta gradici sr. Croes pa e bunita iniciativa pa yuda cu reconstruccion di e pasadia despues di e candela di dia 17 di augustus. E fundacion a comenta, “Nos ta gradici inmensamente tur persona cu a aporta cu un donacion den e box pa Pasadia Briyo di Solo. Ta hopi great pa sinti e calor humano di e comunidad cu semper ta cla pa yuda otro cu ta den necesidad!”
