Parlamento den su totalidad (ainda) no a duna un declaracion riba e situacion di Covid19 cu ta birando preocupante. No solamente pa motibo cu e contagio ta hopi halto, sino cu na dr. Horacio Oduber Hospital, HOH, a cuminza lanta preocupacion pa e cantidad di personanan interna. Manera Bon Dia Aruba a publica, e problema grandi no ta necesariamente e capacidad di cama sino e personal limita.

Riba rednan social, enfermeronan y dokternan cu ta traha na HOH ta urgi comunidad pa sigui e precaucionnan pasobra e ta birando bisto cu e cantidad di personanan cu mester keda hospitalisa ta aumentando, y consecuentemente, no tin suficiente personal pa atende otro intervencion medico.

Silencio

Bon Dia Aruba a acerca lidernan di fraccion pa nan opinion riba e situacion, y mester bisa cu e unico cu a reacciona tabata lider di fraccion di RED, Ricardo Croes kende ta consciente cu e di dos ola aki ta 15 biaha mas pisa cu ora cu Covid a drenta Aruba na Maart.

Pero Croes ta bisa cu mester pone den balans e aspecto economico di tur hende, pasobra un paro economico tin consecuencianan mas grave ainda. Ya caba, tin hopi hende cu ta sin trabou.

“E situacion actual di contagio di Covid19 no ta algo cu por midi. Nos no tin nada pa haci comparacion. A tuma un acercamento radical na Maart. Pero ta parce cu nos a traha net pa robes. Pasobra awor cu e ta hopi mas serio, Aruba ta hopi mas flexibel.”

Y e flexibilidad aki ta debi na e situacion economico, pasobra na Maart, berdad a ataca e virus, pero economia a dal para.

“Pa e di dos ola aki, ta tumando desaroyonan internacional na cuenta, y consehonan di instancianan manera WHO. Mi no por bisa cu esaki ta algo bon of algo malo, pasobra no tin nada pa compara. Pero e problema economico ta dal mas duro mes cu Covid.”

RED y educacion

Realidad ta cu e contagio ta hopi halto na Aruba y pa RED e ta un contradiccion cu di un banda ta pidi hende pa no aglomera, pero toch ta habri scol. “Minister di Enseñansa no tabata kier pa a habri scol. Pero e decision ya no ta den su man. E Crisis Team ta encarga cu e decisionnan y e responsabilidad ta cay pa Prome Minister Evelyn Wever Croes, cu ta na cabez di e team.”

Croes ta bisa cu e ta compronde e diferente factornan cu ta hunga un rol den e decision di e Crisis Team pa laga scolnan habri. “Tin e factonan psicologico pa muchanan, proteccion di muchanan cu ta biba den situacion vulnerabel, y mayornan mester bolbe den e mercado laboral y nan no tin forma pa paga otro hende pa cuida nan yiunan.” Pero realidad ta cu e virus ta drenta scol y manera cu a sucede na otro pais, aki tambe algun scol mester a cera.

No kier pa hende fiesta, pero ora cu algun scol ta dicidi cu nan no ta bay duna les digital, anto ta obliga tur mucha pa bini hunto den klas y no tin distanciamento social posibel. “E virus ta pega riba aerosolnan y ta plama facil den un klas. E acercamento aki ta contradeci e maneho unda no kier pa hende aglomera.”

E hecho cu no kier duna les digital ta pa motibo di politica, segun Ricardo Croes. Sindicatonan, otro organisacionnan, y hasta cierto media ta instiga pa no forsa e rumbo di digitalisacion. “Si scucha Sra. Hernandez cu ta bisa cu Aruba no ta cla pa digitalisacion y Setar ta bisa cu si, e pregunta ta dicon tin e contradiccion aki.” RED ta insisti cu e miho forma pa baha e contagio ta berdad sigui cu e maneho pa prohibi aglomeracion, pero tambe pa laga muchanan cu no tin internet of computer atende scol normal y esnan cu si tin acceso, sigui les na cas. “Docentenan por bay riba Facebook live mes, ta un les so mester prepara. Riba dje, e ta keda graba. E no ta parce mi hopi complica.” Pero, e decision no ta den man di e Minister, Croes ta enfatisa.

Economia

Ricardo Croes ta kere si cu a pesar cu ta sigui tene Aruba habri pa e poco economia sigui draai, cu ta hopi hende tin na cas cu no tin trabou. Mayoria ta hendenan cu ta di e sector hotelero. “Economia mundial a y ta bay cambia. Nos mester diversifica, y cuminza abastece pa nos mes.” Agricultura mester haya mas atencion y tambe bay pa fuentenan di energia alternativo. “E trabou di e waiter, e housekeeper, nan no ta bin bek, pa awor. Pero mester uza e tempo aki pa re-educa tur e trahadonan aki. E futuro ta den tecnologia informativo, IT. Esaki mester ta enfoke di e pais aki. Laga nos uza e ‘downtime’ aki pa bay otro nivel.”

Dokternan mientrastanto ta urgi comunidad pa no sigui aglomera, pa no actua comosifuera e virus no ta peligroso. Nan ta premira un momento hopi cerca cu no por trata mas pacient. Bon Dia Aruba lo keda pendiente reaccionnan di lidernan di otro fraccionnan pa scucha nan opinion riba e crisis grandi di Covid19 na Aruba.